In Sardigna 156 Comunos sèberant su sìndigu nou Tra is prus mannos Cuartu, Nùgoro e Portu Turre. Niuna lista in bator biddas, acanta ant a arribbare is cummissàrios.

Ant a èssere 156 is comunos sardos in ue s’at a votare pro is eletziones amministrativas de su 25 e 26 de mese de ladàmine. Bator is biddas in ue non sunt istadas presentadas listas e acanta sa Giunta regionale at a mandare unu cummissàriu: si tratat de Sèneghe, Talana, Brevìe e Sòrgunu.

Diferente sa chistione in àteros 48 Comunos in ue est istada presentada una lista isceti. Bolet nàrrere chi pro èssere elègidos is candidados ant a dèpere otènnere su 50 pro chentu de is votos (prus unu) de chie tenet su diritu. Tra is Comunos prus mannos chi votant nche sunt Cuartu Sant’Aleni, Nùgoro s’ùnicu cabulogu de provìntzia, e Portu Turre. In custa tzitade su disafiu est tra Massimo Mulas (tzentrumanca), Sebastiano Sassu (M5s), Franco Satta (lista tzìvica autonomista) e Alessandro Pantaleo sustentu dae su Psd’Az.

Is nugoresos imbetzes ant a seberare su sìndigu nou tra su primu tzitadinu de immoe Andrea Soddu, Carlo Prevosto (tzentrumanca), Pietro Sanna (tzentrudereta), Alessandro Murgia (M5s), Francesco Guccini (Mpd), Lisetta Bidoni (Progetu Nùgoro 20-25) e Ciriaco Offeddu (tzìvica).

In Cuartu torrat a si presentare a is eletziones Graziano Milia chi giai aiat ghiadu sa tzitade meda annos a como. Cun issu Francesco Piludu puru, chi at bintu is primàrias de su tzentrumanca, Christian Stevelli candidadu de su tzentrudereta. Guido Sbandi ghiat su Movimento Cinque Stelle. Nche sunt puru Francesco Pandolfi e Alberto Grimaldi ognunu cun sa lista tzìvica sua.

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*