Kentzeboghes 2020, torrat su cuncursu pro su tzìnema in sardu Ocannu b'at puru una setzione dedicada a sas limbas de minorìas italianas

B’at tempus finas a martis, su primu de su mese de cabudanni 2020, pro leare parte a su prèmiu Kentzeboghes 2020, su primu cuncursu pro progetos tzinematogràficos in sas limbas e dialetos de sa Sardigna e, dae ocannu, abertu fintzas a sas limbas minoritàrias italianas.

Sa partetzipatzione a su cuncursu, organizadu dae s’assòtziu culturale Babel, dae sa sotziedade Umanitària – Cineteca Sarda de Casteddu, EjaTv e Areavisuale Film, est gratùita e est partzida in duas categorias: progetos tzinematogràficos in sas limbas de sa Sardigna (sardu, aligeresu, catalanu, tabarchinu, gadduresu, tataresu) e progetos tzinematogràficos in sas limbas minoritàrias italianas (tuteladas dae s’artìculu 2 de sa lege 482/1999).

Si podet imbiare prus progetos, de fiction o documentàrios, chi depint tènnere una durada màssima de trinta minutos. Sos film realizados partinde dae sos progetos premiados ant a bènnere presentados a su ‘Babel Film Fèstival 2021’ e ant a èssere promòvidos in su ‘Babel in Tour’. Ant a èssere assignados duos prèmios in dinari, cada unu de 2.500 èuru.

Informatziones pro partetzipare a su cuncursu dda podeis agatare a s’indiritzu http://www.babelfilmfestival.com/it/kentzeboghes/

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.