Tocat abetare su mese de Nadale pro tènnere novidades dae s’indàgine chi pertocat sa morte de Manuela Murgia, sa pitzoca agatada sena vida in Casteddu prus de trinta annos a oe, in su freàrgiu de su 1995.
Is parentes, chi ant lutadu pro fàghere abèrrere un’àtera borta is indàgines de unu fatu tratadu comente suitzìdiu, abetant is resurtos de is anàlisis genèticas subra is imprentas agatadas in is bestiris de Manuela Murgia abarrados cunservados pro totu custu tempus. Posca su Dna otènnidu andat cunfruntadu cun su de su fidantzadu de tando, Enrico Astero, chi como figurat comente s’ùnicu indagadu pro sa morte de sa fèmina.
ARCHÌVIU. Manuela Murgia, unu misteru longu trinta annos
Forsis però sa chistione si podet finas amanniare. Su programa Chi l’ha visto? in unu servìtziu trasmittidu mèrcuris at intervistadu is sorres e su frade de Manuela Murgia, is abogados e ultres a su mèigu legale Roberto Demontis finas Enrico Astero etotu. S’òmine, chi in su 1995 teniat 24 annos, narat chi isse no nch’intrat nudda cun sa morte de Manuela pro ite sa die de s’iscumparsa fiat faghende àteru, fiat in un’àteru logu e tenet finas testimòngios. “So torrende a bìvere unu bisu lègiu” at decraradu narende chi at a èssere a disponimentu pro su cunfruntu de su Dna.
In custa istòria como però ddoe sunt àteras dudas puru. Comente sa vetura de colore blu in sa cale calecunu de su bighinadu at bidu intrare Manuela su 5 de freàrgiu de su 1995. Una vetura blu Peugeot chi, paret, fiat a disponimentu de unu fradile de Astero. In prus abarrat su misteru de su dinare, chentu mìgia francos divìdidos in billetes de deghe e chi Manuela teniat cuados a intro de unu lampadàriu, e is pensamentos chi in is ùrtimas dies dda faghiant prànghere a secutu. Intre is ipòtesis de is abogados ddoe est finas su coinvolgimentu in unu giru e in problemas meda prus mannos pro una pitzoca de seighi annos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
