Trinta annos sunt medas pro agatare unu mortore ma a pustis de trinta annos forsis si podet torrare a iscrìere s’istòria trista meda de una pitzoca de Casteddu.
A Manuela Murgia dd’aiant agatada sena vida su chimbe de freàrgiu de su 1995 in su canyon de Tuvixeddu in Casteddu. A pustis de una telefonada anonima a sa Politzia. Teniat deghe-ses annos e tando is esàmenes fatos dae is espertos de sa Procura aiant marcadu sa morte comente unu casu de suitzìdiu.
Manuela si diat èssere ochida betende•si a terra dae su canyon. Una versione chi però no at mai cumbìnchidu sa famìlia chi prus bortas at proadu a fàghere abèrrere torra is indagines. In su 2024 ant finas abertos una pàgina in Facebook ue ant cumintzadu a publicare fotografìas e documentos ponende dudas subra sa versione sighida dae sa prima indagine. Dae tando s’istòria est torrada de atualidade in is giornales e intre sa gente.
Gràtzias a su traballu de is abogados Giulia Lai e Bachisio Mele ant presentadu a sa Procura de sa Repùblica documentos noos in paris cun una consulèntzia de su mèighu legale Roberto Demontis. Su de Manuela non diat èssere suitzìdiu, is fèrridas diant èssere prus sìmiles a cuddas de una vìtima de un’intzidente istradale. Prima però a Manuela calicunu, forsis prus de una persona, dd’at violentada.
In prus, comente iscriet s’Ansa in un’artìculu de martzu de ocannu, b’at su fatu chi carchi die prima de sa morte is parentes aiant iscobertu chi sa pitzoca cuaìat in domo dinari e teniat pensamentos chi dda faghiant prànghere. Custa est sa tesi chi sighint pro arribbare a un’àtera veridade.
Como in agiudu b’at finas su genetista Emiliano Giardina, unu nùmene giai connotu dae is giornales pro ite pròpiu isse aiat contribuidu a agatare su Dna de “ignoto 1” in su casu de sa morte de Yara Gambirasio. Sa veridade diat podere arribbare dae s’istùdiu de is bestidos chi portaìat Manuela Murgia cando dd’ant agatada in Tuvixeddu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
