Si mutit “Fùbalu… e novas” e est su periòdicu nou pensadu e contivigiadu dae s’Ufìtziu Linguìsticu de Seui in intro de su progetu “Su sardu est a petotu 2”, chi nde faghent parte, in prus de Seui, su comunu cabufilera, fintzas Foghesu, Ussassa e Jersu.
Su giornale no est unu simpre bulletinu, ma unu ponte intre is comunidades, iscritu cun s’orgòlliu de chie sèberat de contare s’isport e s’atualidade in sardu, contribuende a s’amparu e a valorizatzione sua.
Comente si podet cumprèndere dae su tìtulu, is noas tratant mescamente de fùbalu, prus che totu de is campionados locales e duncas de is resurtados de is iscuadras de is biddas chi faghent parte de su progetu. In is pàginas, chida cun chida, s’agatant is crònacas de is partidas de su fine chida cun cummentos tècnicos e agiornamentos de is classìficas.
Però “Fùbalu… e novas” – narat su responsàbile de s’isportellu linguìsticu Francesco Emanuale Deplano, – no allegat de fùbalu ebbia, ma fintzas de àteras atividades isportivas presentes in su territòriu, comente pro esèmpiu sa pallavolo, cun sa punna de pònnere a notu is àteras fainas isportivas locales.
Interessante meda est fintzas s’istrategia de ispàinu leada pro sa difusione de su periòdicu, chi est a disponimentu siat in formadu digitale, pro mèdiu de is canales sotziales de s’Isportellu linguìsticu, siat in sa versione cartàcea – como galu in proa – chi at a èssere disponìbile in is tzilleris e in is locales de is bator biddas interessadas. S’idea est sa de favorèssere s’informatzione in sardu in is logos de atòbiu, favorende momentos de cunfrontu tra is tzitadinos, intre una tzicheredda de cafè e una tzantzarrada tra amigos.
Lòmpidu a is primos duos nùmeros, su semaneri est giai aumentende is argumentos e is càbidos suos, cun sa punna de si furriare a trastu de informatzione locale cumpleta. In prus de s’isport, difatis, “Fùbalu… e novas” faeddat de crònaca, avisos comunales, comunicatziones de pùblica utilidade, atòbios culturales e curiosidades de su logu e progetos de is amministratziones locales.
In custa manera – agiunghet Deplano- bolimus fàghere bìere chi su sardu est una limba moderna e capassa de tratare cada cosa, dae is retes de su domìnigu a is chistiones de su Cunsìgiu Comunale.
Is primos duos nùmeros sunt a disponimentu inoghe a suta:
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
