Si podet fàghere arte e tzìnema fintzas impreende unu telefoneddu. In su mundu nche sunt medas festival de tzìnema chi promovent pellìculas realizadas gràtzias a su telefoneddu e como in Sardigna puru, in Cuartu Sant’Aleni, arribbat sa prima editzione de su ‘Phone video fèstival’.
Sos addòbios in programma pro su fèstival s’ant a tènnere in sa chida tra Paschighedda e s’ùrtima die de s’annu. Sa diretzione artìstica est de su regista Giovanni Columbu. S’initziativa est promòvida dae s’Assòtziu Enti Locali pro sas atividades culturales e de ispetàculu, cun su contributu de su Comunu de Quartu e de sa Regione.
Su festival previdet sa gara tzinematogràfica ‘Raccontare con lo smartphone’. Sos chi leant parte ant a pòdere imbiare s’òpera issoro, prodùidas isceti cun su telefoneddu, de durada cumpresa tra unu e chimbe minutos. Sas òperas finalistas ant a bènnere seberadas dae una truma de espertos, chi in su seberu ant a dèpere tènnere in contu fintzas su nùmeru de ‘like’ chi sas pellìculas ant a pigare in sas pàginas de sas retzas sotziales de su Fèstival. Sos traballos ant a èssere ammustrados durante sa rassigna. Sas òperas binchidoras ant a èssere partzidas in duas categorias: giòvanos chi galu non tenent 25 annos, cun sa premiatzione de sos primos tres classificados, e òmines e fèminas cun prus de 25 annos.
Sunt prevìdidos fintzas addòbios cun espertos de su setore tzinematogràficu: su regista Matteo Incollu e sos crìticos Antioco Floris e David Bruni, dotzentes universitàrios, comente a Diego Cavallotti, e giòvanas atoras, comente a Simonetta Columbu.
In programa b’at fintzas una setzione-laboratòriu intregada a sas pellìculas curtzas. “B’at coràgiu in su chi siamus faghende – at naradu su sìndigu Graziano Milia -. Sa narratzione cun su telefoneddu est sena duda unu bellu disafiu”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
