Su «fogu de su fraile», capatze de s’inchèndere e de s’annoare de continu sestende sa limba nostra e contende sa modernidade cun sos disafios suos, est su cuntzetu chi sintetizat s’ispìritu de su Prèmiu Otieri de Literadura sarda chi lompet 70 annos de vida. Custu cuntzetu l’at bogadu a campu su presidente de sa Giuria de su cuncursu nòdidu, su prof. Dino Manca, a pagas dies dae sa tzerimònia de sa de 67 editziones.
Sa manifestatzione culturale istòrica at a tzelebrare custu traguardu istraordinàriu sàbadu su 26 de cabudanni, comintzende dae sas 16.30 in su “Padiglione fieristico” de Santu Nigola (una fratzione otieresa). S’eventu rapresentat una torrada a sas orìgines, sende chi fiat nàschidu in su 1956 in intro de sa festa cabudannita de Nostra Sennora de su Remèdiu. Comente sutaliniadu dae su presidente de s’Aps Premio Ozieri, Vittorio Ledda, su cuncursu òcupat su de chimbe postos ex aequo in Itàlia intre sos prèmios de poesia prus sèneghes, cunfirmende·si in prus comente su primu in assolutu pensadu in una limba minoritària diferente dae s’italiana.
Custos sos sèberos de sa giuria. Pro sa setzione de poesia sarda “Antoni Sanna” su primu postu andat a Vincenzo Pisanu cun s’òpera “A fogu aintru”, unu cumponimentu ue sas framas sunt una metàfora de su dolore e de s’esistèntzia. Pro sa de sa prosa sarda “Tonino Ledda” sa vitòria est de Giampaolo Pisu cun “Sa bòcia”, unu contu distòpicu chi esplorat su tema de sa mannosidade. In fines, pro sa setzione intre poesia e càntigu “Antoni Cubeddu”, su reconnoschimentu printzipale est pro Sandro Biccai cun “Abbandonada”, una riflessione chi pertocat s’amparu de sa limba sarda comente sìmbulu de identidade universale. Sa tzerimònia l’at a presentare Piersandro Pillonca, cun sa diretzione artìstica de Marco Fenudi, pro annoare sa grandu festa de sa literadura isulana.
