S’est rèndidu sa die a pustis chi su Sennore suo est resuscitadu. Paba Frantziscu, chi nche l’aiant ricoveradu dae su 14 de freàrgiu a su 23 de martzu, non bi l’at fata. Sas cunditzione suas de salude las amus pòdidas bìdere finamentas in custa dies de chida santa, cun sas pagas paràulas suas, suferentes, indiritzadas a is chi fiant in pratza de Santu Pedru.
Su de 266 pontèfitzes de sa crèsia catòlica at tancadu sos ogros chi aiat 88 annos. Lòmpidu «dae sos concruos de su mundu», comente naradu dae issu etotu, Jorge Mario Bergoglio, custu su nùmene suo, naschet su 1936 in Buenos Aires dae una famìlia de orìgine italiana.
Su comintzu de su caminu religiosu tenet comente data su 1958, cando intrat a seminàriu cun sos gesuitas. E in custu caminu isse si format. Retzit s’ordinatzione dae s’archepìscamu Ramón José Castellano su 1969, sos annos chi in Sud Amèrica s’isvilupat su movimentu de sa Teologia de sa Liberatzione.
Bergoglio (mancari l’apant medas bortas atacadu dae destra in sos annos de su pontificadu suo) si presentat tando a sos fideles comente un’oponidore de custa tendèntzia de manca chi poniat in evidèntzia sos valores de emantzipatzione sotziale e polìtica presentes in su messàgiu cristianu.
Unu «ridutzionismu sotzializante», a bisu suo, una «ermenèutica marxista» de sos testos sacros. Piscamu dae su 1992, archepìscamu dae su 1997 e cardinale dae su 2001 cun Paba Giuanne Pàulu II, Bergoglio sèberat comente motu episcopale suo “Miserando atque eligendo”, cun cussu cuntzetu de misericòrdia chi si nch’at giutu a sa sede pontifìtzia, dae su 2013.
In bestes arbas, Frantziscu at faeddadu de sos temas de custu tempus: dae sa giustìtzia sotziale a su contivìgiu de s’ambiente. Cun s’entzìclica “Laudato si’” de su 2015 at istèrridu paràulas contra a su cambiamentu climàticu; cun sa de su 2020 “Fratelli tutti” nch’est intradu a intro de s’amistade sotziale intre sos òmines.
Unas cantas bìsitas suas nd’ant fatu su Paba de is ùrtimos: dae su campu pròfugos de Lesbo su 2016 e su 2021 a sa galera de Rebibbia, in ue su die de Santu Istèvene de s’annu in pessu coladu at abertu sa ghenna santa narende chi «in presone b’andant sos pisches minores, pro ite issos emmo e deo nono?». Fintzas custa chenàbura santa nche fiat in pare cun sos detenutos.
Ma suo fiat unu progressismu gesuita chi non si nche podiat istesiare dae sas raighinas traditzionalistas chi l’ant nudrigadu in totu sa vida religiosa sua. In sa prus cunservadora de sas entzìclicas, “Lumen Fidei” de su 2013 chi aiat comintzadu Beneitu XVI, essit cun fortza su ruolu de sa famìlia in sa sotziedade comente unione matrimoniale intre òmine e fèmina ebbia.
Su «chie so deo pro giugare?» in contu de omosessualidade est semper andadu a manu tenta cun sa clàssica visione eclesiàstica in tema de gèneres. Fintzas peus pro sos mèigos chi agiudant sas fèminas a istrumare: «Sicàrios», at naradu carchi mese a como.
Morit una figura chi at fintzas proadu a nàrrere sa sua pro sas gherras de oe, Ucraina e Palestina. E morit pròpiu cando una fase noa, prena de incògnitas, s’est aberende.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
