Sàbadu su 29 in Casteddu b’est su Sardegna Pride. Emmo, su Pride, ca oramai sunt in pagos sos chi li narant Gay Pride a custa manifestatzione. Fintzas ocannu, duncas, sa comunidade Lgbtq at a manifestare s’orgòlliu suo in custa terra in pare cun medas àteros tzitadinos sardos chi gherrant pro sos diritos issoro e duncas pro sos diritos de totu cantos.
Sa manifestatzione at a comintzare a sas 5 de sero in su Parcu de sa Mùsica (su Pride Park) e in cue at a finire – cun sa letura de su documentu polìticu finale – a pustis de àere rugradu carreras e pratzas de su cabu de logu.
Sa manifestatzione est un’apuntamentu istòricu peri su mundu cun raighinas chi cherent chircadas in su 1969, 55 annos a como. Su 27 e su 28 de làmpadas, in su Greenwich Village de sa tzitzade de New York, est coladu in s’istòria comente sas pesadas de Stonewall.
Ite b’at àpidu? Pro bi lòmpere cheret chi incuadremus s’acontèssida in su chi tando faghiat sa politzia cada borta chi persones de cussa comunidade s’addobiaiant in carchi locale: retadas e repressione, bortas meda cun còntigas de pagu sustàntzia chi mudaiant carchi basu in atos isbirgongiados.
Su 27 de làmpadas sa politzia at apicadu sas craes in logu malu. Su die b’at àpidu chie at naradu chi sa cosa podiat bastare. Resistèntzia e atzione direta. Si contat chi fiat sa trans Sylvia Rivera a iscùdere sa prima ampulla contra a sos agentes.
Pro cussu est chi sas pesadas de Stonewall rapresentant sa nàschida de su movimentu de liberatzione de cussa comunidade. Pro cussu est chi su Pride si faghet in cussas chi sunt connotas comente sas dies de s’orgòlliu omosessuale.
Un’orgòlliu chi sos chi bene pensant – o gasi narant de issos etotu – bident comente una professone de carrasegare o – cun tràgiu paternalìsticu – una cosa chi nch’istèsiat sa gente dae sas resones issoro. Sa solutzione diat èssere a b’andare, e a bìdere chi sa gente est in cue.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
