Sa de chimbe editziones de su Prèmiu Ondras s’at a tzelebrare su 2 de mese de ladàmine in sa Manifattura Tabacchi de Casteddu. Su reconnoschimentu dedicadu a is limbas minoritàrias europeas, ocannu, at a èssere assignadu a su ministru pro sa Polìtica Linguìstica de sa Generalitat de Catalunya.
Est Francesc Xavier Vila Moreno, sotziolinguista e ministru pro sa Polìtica Linguìstica de sa Generalitat de Catalunya, su binchidore de su Prèmiu Ondras 2026, reconnoschimentu intregadu a is personalidades impinnadas in s’amparu e in sa valorizatzione de is limbas minoritàrias in Europa. Sa tzerimònia de sa de chimbe editziones est in programma pro chenàbura su 2 de ladàmine, a ora de is 19, in sa Manifattura Tabacchi de Casteddu.
Nàschidu in Esplugues de Llobregat in su 1966, Vila Moreno est professore ordinàriu de Sotziolinguìstica catalana in s’Universidade de Bartzellona. Laureadu in Filologia Catalana in su 1989, at cunsighidu su dotoradu in Linguìstica in sa Vrije Universiteit Brussel in su 1996. In su cursu de sa carriera sua at dirìgidu su Cusc, su Tzentru de Chirca in Sotziolinguìstica e Comunicatzione de s’Universidade de Bartzellona, su Dipartimentu de Filologia Catalana e Linguìsticu Generale de su matessi ateneu e est istadu su primu diretore de sa rete Cruscat de s’Istitutu de Studios Catalanos. In su 2021 dd’ant numenadu Segretàriu pro sa Polìtica Linguìstica, incàrrigu poderadu finas a sa nòmina a ministru.
Su sèberu de Xavier dd’at ispiegadu su presidente de sa cummissione de is espertos, Giuseppe Corongiu, chi at collegadu su reconnoschimentu a s’istitutzione reghente, pro manu su Guvernu catalanu, de su Ministèriu de sa Polìtica Linguìstica e a su percursu plurideghennale de is istitutziones catalanas in su campu de is polìticas linguìsticas.
In sa targa de su binchidore ddoe at a èssere fintzas unu messàgiu in sardu, pro pònnere a notu s’aficu istitutzionale in s’amparu, valorizatzione e difusione de sa limba catalana, definida un’elementu de fundamentu de s’identidade e de sa cultura europea.
Su Prèmiu Ondras, pensadu e promòvidu dae su Crei Acli dae su 2022 cun s’agiudu de s’Assessoradu regionale de sa Pùblica istrutzione, benes culturales, informatzione, ispetàculu e isport e sa Fondazione di Sardegna, est nàschidu cun sa punna de pònnere sa chistione linguìstica a su tzentru de s’atentzione pùblica e favorèssere su diàlogu intre sa Sardigna e àteras realidades linguìsticas europeas. Su nùmene Ondras, in sardu, bolet nàrrere “reconnoschimentu” o “onore”.
Su progetu non si lìmitat a sa premiatzione, ma bolet fintzas promòvere s’impreu fitianu de is limbas locales, sa collaboratzione cun is istitutziones e su fràigu de retes de diàlogu transnatzionale.
Sa cummissione de is espertos est formada dae su presidente Giuseppe Corongiu, dae s’operadora culturale Daniela Masia, de su sotziòlogu Nicolò Migheli e de sa giornalista Maria Antonietta Piga.
In is annos colados su Prèmiu Ondras at interessadu istudiosos, iscritores, operadores culturales e comunidades linguìsticas. In su 2025 su reconnoschimentu est andadu a sa famìlia sardu-basca Azzena Santiago; in su 2024 a sa comunidade de Orgòsolo, paris cun àteras personalidades impinnadas in s’amparu de is minorias linguìsticas. S’editzione 2023 aiat premiadu fintzas sa linguista Antonella Sorace, su filòlogu Guido Mensching, s’iscritora asturiana Blanca Inès Férnandez Quintana e s’operadore culturale Gianfranco Fronteddu.
Sa primu editzione, in su 2022, imbetzes, aiat postu a su tzentru figuras impinnadas in sa valorizatzione de is limbas minoritàrias, comente Rut Bernardi, William Cisilino e Carles Duarte, cun un’acapiu particolare cun sa memòria de Paolo Pillonca, regordadu pro su contributu suo a sa poesia, a sa cultura e a sa limba sarda.
A sa tzerimònia de su 2 de ladàmine ant a èssere presentes su filòlogu aligheresu Francesco Ballone e sa giornalista Maria Antonietta Piga chi ant a presentare, mentras s’istentu musicale at a èssere afidadu a Beppe Dettori. Sa presentada ufitziale de su prèmiu dd’at a contivigiare Mauro Carta, presidente regionale de su Crei Acli
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
