Sunt 12, tenent tra sos 20 e sos 35 annos, e sunt arribbados in Italia dae Senegal, Guinea, Nigeria, Mali, Marocco, Pakistan, Algeria, Camerùn, Costa d’Avorio. Oe ant retzidu dae sas manos de su Retore de s’Universidade de Casteddu, Maria Del Zompo, su passaportu europeu pro sas cualificas de sos refugiados e de sos richiedentes asìlu.
Su passaportu est unu documentu, prevìdidu dae unu progetu de su Cussìgiu de Europa e sustènnidu dae su Ministeru de s’Istrutzione, chi tzertificat sas cualificas acadèmicas de sos migrantes chi ant cunsighidu unu tìtulu finale de iscola segundària o universitàriu in su paisu issoro ma chi non tenent cun sa documentatzione pro ddu dimustrare, e chi atestat fintzas sas esperièntzias de traballu e sa connoschèntzia de sas limbas.
“Tenent gana de istudiare, crèschere e de bivere in paris cun nois in sa sotziedade nostra. E nois àteros semus alligros de dare issoro custa oportunidade – est su cummentu de su Retore – s’Universidade de Casteddu cun custu progetu los acostàgiat in s’istrada de s’integratzione. Sa làurea at a èssere una cosa de balora pro issos e pro custa terra, sa Sardigna, chi est semper istada solidale. Nois semus istados sos primos a aderire a custu progetu, in paris cun s’Universidade de Tàtari, est unu signale pro totus, pro una sotziedade chi creet in s’inclusione e in sa cultura”.
