Aliga in Casteddu, Zedda: “S’annu imbeniente sa Tari at a calare de su 20%” Sighit sa regorta 'ghenna a ghenna' e pro su Comunu arribant sos primos positivos resurtos. Ma no fartant sas dificultades.

Su sindigu Massimo Zedda e s'assesora Claudia Medda

In Casteddu s’amministratzione at ativadu sa de chimbe fases de su nou sistema de regorta ‘ghenna a ghenna’ de s’aliga. Di fatis dae oe is iscatulas pro s’aliga isparessint dae sas rugas de su bighinadu de Bonaria, Monte Urpinu, Tuvixeddu, Tuvumannu, Sa Vega, una banda de Santa Avendrace e San Bartolomeo.  Ant a lassare tretu a is parchegios pro is veturas. Imbetzes in sas domos de sos abitantes ant a cumparire iscatuleddas pro sa regorta diferentziadas de s’aliga.

Eris a mangianu su sindigu de Casteddu Massimo Zedda at fatu su puntu de sa situatzione. Narat chi sa cosa est andande bene e annuntziat chi giai dae su 2019 is casteddajos diat podere pagare sa Tari a su 20% in mancu. “Nche semus artziande in sa clasifica de sas tzitades chi faghent sa regorta diferentziada e prus amus a mejorare prus at a èssere su risparmiu pro sa gente”. Pro immoe s’aliga diferentziada at coladu dae su 30% a su 49%.

Ma tocat puru a narrere chi sa novidade in Casteddu est atobiande carchi dificultade. Pro esempiu non fartant, mescamente in sa municipalidade de Pirri, istradas in ue bi sunt sacos de aliga ghettados aici dae calicunu male educadu. Non fartant casteddajos chi, arrennegados a su ‘ghenna a ghenna’, prenent de aliga sas iscatulas abarradas in sas rugas de sos ateros bighinados. Non fartant iscatulas prenas de aliga in su tzentru tzitade.

Fotografia iscatada s’oto de su mese de cabudanni 2018 in su Largo Carlo Felice
T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.