Sàbadu, su 26 de mese de ladàmine, su comunu de Armùngia at a tzelebrare s’inauguratzione de sa Biblioteca comunale noa intitulada a Emilio Lussu, importante iscritore, polìticu e antifascista nàschidu in sa bidda de su Gerrei. Sa biblioteca noa at a abèrrere in un’istrutura torrada a cualificare gràtzias a is finantziamentos de s’Unione Europea in intro de su PNRR.
S’inauguratzione, organizada in collaboratzione cun s’assòtziu culturale L’Alambicco, s’at a fàghere in su Polo culturale de s’arborada Antonio Gramsci, in ocasione de sa de X editziones de su Fèstival Premio Emilio Lussu.
Sa tzerimònia at a cumintzare a is 17:30 cun is saludos de su sìndigu Antonio Quartu, sighidos dae sa presentada de is tres volùmenes de is Atos de is Cunvegnos Internatzionales de istùdios subra Emilio Lussu, realizados intre su 2018 e su 2022. Custos volùmenes, publicados dae s’assòtziu L’Alambicco, regollint is contributos de istudiosos de universidades italianas e europeas, oferende un’anàlisi interdisciplinària chi andat dae s’istòria a sa literadura, dae sa polìtica a s’arte. Gràtzias a fontes inèditas e documentos cuberados in is archìvios europeos, is istùdios ant prodùidu interpretatziones noas de s’òpera de Lussu.
A s’addòbiu ant a intervènnere Gian Giacomo Ortu, presidente de su Comitadu sientìficu internatzionale de su Fèstival, e is curadores de is volùmenes Alberto Cabboi e Christian Rossi. A is 18:30 s’at a inchingiare sa biblioteca, chi est in intro de un’istrutura asseliada cun finantziamentos de s’Unione Europea in s’àmbitu de su PNRR.
Paris cun s’inauguratzione, at a èssere aberta una mustra dedicada a is manifestos de s’Istitutu Sardu pro s’Istòria de sa Resistèntzia e de s’Autonomia, e is bisitadores ant a pòdere cumpudare s’istùdiu de Emilio Lussu, torradu a cuncordare dae pagu tempus in Armùngia a pustis de unu restàuru.
In sa serada at a èssere fintzas ufitzializada sa lassa de una còpia de is volùmenes chi partètzipant a su Prèmiu Lussu pro is setziones de narrativa, sagìstica e narrativa a giornaleddos, parte de s’archìviu istòricu de s’assòtziu L’Alambicco e de su Fèstival.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
