Unu viàgiu a palas de su tempus, colende in is caminos marcados dae is cummertziantes de astra (ghiàciu) chi dae is montes de sa Barbàgia andaiant a frunire is tzitades de sa Sardigna. S’Assemblea Natzionale Sarda – Assemblea Territoriale de su Mandrolisai, paris cun Your Sardinia Experience, organizat “Su caminu de is niàlgios”.
S’eventu est in programma domìniga su 6 de abrile, at a mòere dae Aritzu cun ddòbiu a is 9 oras in bia Rettorale nùmeru 2 (Pratza de crèsia). Dae in cue, cadaunu cun sa màchina sua, is partetzipantes ant a lòmpere a su cumentzu de sa caminera, a pagu prus o mancu 5 km dae sa bidda.
Sa passillada est longa 13 chilometros, de dificultade mèdia, e duncas tocat tènnere: crapitas de trekking, taschedda cun 2 litros de abba, capeddu, crema solare e bistimenta adata siat pro chi ddoe apat sole o chi proat.
Sa partetzipatzione est a pagamentu:
- 20 èuros pro su billete ordinàriu
- 15 èuros pro is sòtzios de Ans
Pro si marcare tocat a imbiare unu sms o unu messàgiu in Whatsapp a su nùmeru +39 340 006 9191 (Frantziscu) o mandare una lìtera: atmandrolisaians@gmail.com.
S’eventu, faghet ischire Ans – cheret èssere ocasione pro torrare a iscobèrrere sa memòria istòrica de sa Sardigna, dande balore a su ligàmine tra comunidade e ambiente.
