S’ìsula nostra at a acasagiare duos personàgios mannos comente a Cara Delevingne e a Bear Grylls.
Sa prima semus giai abituados a l’ammirare in sas passerellas de s’arta moda de totu su mundu. Su segundu imbetzes, famadu meda in America e in Inghilterra, est un’amantiosu de s’aventura chi gràtzias a su passadu militare suo, tenet s’abeju pro su perìgulu e pro sas impresas impossìbiles.
Sos àteros protagonistas de sa sèria pensada dae sa BBC, in ue Bear invitat a sos divos de Hollywood, ant a èssere Alex Honnold, Bobby Bones, Dave Bautista, Joel McHale, Rob Riggle e Zachary Quinto. Sas capatzidades e s’atrivimentu issoro ant a èssere postos a sa proa pro afrontare situatziones in ue at a contare meda s’istintu de subravivèntzia, sa resolutesa e sa bògia de nd’essire bios!
Bear Grylls at giradu sa puntada cun Cara Delevingne s’istiu coladu in Ogiastra. Sos duos si nche sunt betados sena timòria in impresas aventurosas: calende in sos gùturos fungudos istuvidos in sa roca, colende dae una banda a s’àtera de sos bacos isfundos ogiastrinos picados petzi a una fune e apicurrendesi in sas costas de muru iscosciòsas de sos montes de sa Sardigna tzentru-orientale.
Sa modella londinesa, famada pro sas batallas sotziales suas in difesa de sos deretos de sas femìnas, non s’est betada a sa nega, nemmancu cando l’ant propostu de si papare unu sòrighe pro chena.
Sos telespetadores britànnicos e americanos ant tentu s’ocasione de connòschere sa parte prus agreste e amaliadora de sa Sardigna, fintzas gràtzias a un’icona de sa moda che a Cara Delavigne. Semus seguros chi immoe in medas ant a copiare sas balentias suas. Prus isconchiosu at a èssere imbetzes a copiare sa dechidesa ùnica de sa supermodella britànnica.
