Santa Igia, firmada sa pisca in sa laguna de Casteddu Segundu sa Assl s'abba est prena de biotossinas chi imbrutant cociulas e piscis e sunt perigulosas pro is òmines

Stop a sa pisca in sa laguna de Santa Igia. Dd’at detzìdidu sa Assl de Casteddu. Su seberu nd’arribat a pustis de s’analisi de s’abba chi at cunfirmadu s’impestamentu dae biotossinas produtas dae sa posidonia.  Custas biotossinas difatis intrant finas in is piscis e cociulas e sunt de perigulo mannu pro is òmines chi ddos pappant. Sa Assl at naradu chi est permìttida sa bendida isceti pro mèdiu de mercados e pescadorias autorizadas. Duncas no podeis comporare dae is bendidores in s’istrada.

Su primu resurtu de custa situatzione est chi immoe is piscadores non podent traballare ma calicunu at giai proadu a inghiriare sa proibitzione. Oe sa Forestale in nd’unu blitz in sos territorios de Casteddu, Cabuderra e Sinnai at secuestradu 150 chilos de cociulas chi fiant istadas regòglida in sa laguna. Pro custu fatu chimbe pessones sunt istadas denuntziadas.

Is agentes de sa Forestale in Santa Igia
T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.