Ddoe ant fueddus chi non narant una cosa ebbia. Ammentant logus, personas, arregordus. Contant una manera de castiai su mundu. Est a inghìriu de cust’idea chi nascit “Fueddus Pintaus”, su programa televisivu nou in lìngua sarda produtu de Artisti Fuori Posto e realizau cun s’agiudu de sa Regioni Sardigna in s’àmbitu de su programa Imprentas 2025-26.
Dòixi fueddus diventant dòixi biàgius in sa cultura e in s’imaginàriu de sa Sardigna de oi. Ònnia puntada partit de unu fueddu, una paràula sarda scioberada po sa capacidadi sua de ammentai emotzionis, arregordus e significaus, e po atobiai un’artista o unu protagonista de sa cultura de s’ìsula.
Su programa, diretu de Filippo Salaris, ddu ghiat Alessandro Pani chi, gràtzias a s’arresonu cun is òspitis (Elena Ledda, Lia Careddu, Renzo Cugis, Antonio Pani, Davide Piras, Randagiu Sardu, Giuseppe Boy, Fabio Marceddu, Anna Cristina Serra, Augusto Mola, Andrea Fulgheri, e Antonello Pilittu), at a circai su raportu intre de su fueddu scioberau, s’esperièntzia personali insoru e su percursu artìsticu.
Su programa ponit a costau de is intervistas una rubrica dedicada a sa cultura sarda. Piero Murenu at a curai su setori de aprofundimentu culturali, mentras Marco Piras firmat Sa fàbrica de is fueddus, dedicada a s’etimologia de is fueddus e a sa stòria insoru. Myriam Mereu at a curai invecis Fotogramas sardus, rubrica dedicada a su cìnema e a su raportu intre de is fueddus e is imàginis.
S’arresultau est unu format chi aunit arresonu, aprofundimentu linguìsticu, tzinematogràficu e contu documentarìsticu, cun unu linguàgiu visivu contemporàneu e un’atentzioni particulari a is fueddus.
Fueddus Pintaus no bolet sceti cunservai is fueddus de su sardu, ma amustrai sa capacidadi insoru de contai su presenti, amustrendi ca una lìngua acapiada a fundu a sa memòria de s’ìsula podit èssiri puru oi un’atividadi bia de espressioni e de creatzioni.
Su programa at a andai in unda de su 2 de cabudanni, su mèrcuris e sa cenàbara a is seti e mesa de sero (19:30) in Rts – Radio Televisione Sarda a su canali 79.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
