Cenàbara cincuxentus fèminas ant percursu iscrutzas is seti chilòmetrus intre Cabras e su bidditzolu de Santu Srabadoi. Cun s’arribu de Santu Srabadoeddu funt comintzaus uficialmenti is ùndixi diis de Festa.
A is primas oras de su mangianu, sa processioni at lassau sa bidda e at pigau su camminu de su Santu. Iscrutzas, cun is bistimentas de sa traditzioni, is fèminas ant sighiu afrontendi una dii fata prus grai po is cunditzionis de su tempus.
«Cun s’arribu de Santu Srabadoeddu a Santu Srabadoi cumentzat unu de is apuntamentus prus de importu de s’annu po Cabras. Is ùndixi diis de Festa funt unu momentu de partecipatzioni manna, chi aunit su valori de sa traditzioni a sa vida civili de sa bidda. S’impinnu nostru est cussu de acumpangiai custas diis cun atentzioni e responsabilidadi, avalorendi un’eventu chi apartenet a fundu a su territòriu» narat su sìndigu de Cabras Andrea Abis.
«Po nosu custu camminu cumintzat meda prima. Ddoe at s’ammanitzu de is bistimentas, su mucadori cuncordau in conca, is oratzionis chi scieus de semper. Ocannu eus tentu cun nosu medas piciocas giòvanas, e custu est forsis s’aspetu chi nos fait emotzionai de prus: sciri ca cussu chi eus arriciu de is famìlias nostras no si frimat a nosu, ma sighit gràtzias a chini oi camminat po sa prima borta a costau de is mammas e de is ajajas suas» narat sa presidente de s’Assòtziu Santu Srabadoeddu Maria Francesca Spanu.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
