Presentadu in Casteddu s’Osservatòriu sardu in contu de seguresa istradale 2024. Su documentu, chi analizat sos nùmeros de sos intzidentes acontèssidos peri sas istradas su 2023 e sos annos in antis, l’ant istèrridu a incuru de s’assessoradu de sos Traballos pùblicos e de su Tzentru interuniversitàriu de chircas econòmicas e de mobiladae (Cirem) elaborende sos datos Istat e cun sa punna de àere una connoschèntzia prus funduda de su fenòmenu.
Sos datos, in prus de sestare unu cunfrontu cun sas fotografias de sas àteras regiones de s’istadu italianu, movent dae sa racumandatzione betza de s’Unione europea de reduire, in su deghènniu 2013–2023, su nùmeru de sos mortos de su 50%. In totu Itàlia, pro nàrrere, su datu de non nche barigare fiat de 1.692 unidades: su datu definitivu est 3.039, cun una mèngua pertzentuale petzi de su 13,5. In Sardigna, cun 110 mortos su 2023 semus firmos a unu -12%.
In riferimentu a su 2022 de mortos bi nd’amus àpidu 100. De custos nde contamus 28 in sas istradas istatales. Tres in cada una de custas: sa 125 (orientale sarda), sa 126 (sud otzidentale sarda), sa 129 (trasversale sarda), sa 387 (de su Gerrei) e sa 389 (di Buddusò e Correboi). Duos in custas àteras: sa 130 (Iglesiente) e sa 292 (nord otzidentale sarda).
Ma sunt 37 sos chi b’ant lassadu sa vida in sas provintziales «Custu elementu – at naradu s’assessore Antonio Piu in riferimentu a sas Sp – nos at permìtidu de avalorare s’istantziamentu de 110 milliones pro las pònnere in seguresa». Sos àteros detzessos los contamus in sas urbanas (21) e in àteras tipologias de istradas (14).
Cunforma a custos 100 de su 2022 sa partzimenta provintziale custu nos narat: 30 in sa de Tàtari-Terranoa (su peus datu), 17 in sa de Nùgoro-Ogiastra, 14 in sa de Aristanis, 18 in sa de su Sud Sardigna, 21 in sa tzitade metropolitana de Casteddu.
S’annu coladu sa Regione at annoadu sa cunventzione de su 2013 cun su Mit, cosa chi règulat s’acumprimentu de sas atividades de su Tzentru de monitoràgiu Cremss. Sa cunventzione – leghimus in sa nota regionale – «at a permìtere finamentas de connòschere a minudu su sistema istradale e de pianificare e programmare sos interventos pro su megioru de sa rete viària de s’ìsula».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
