Fìamus abarrados a sos bombardamentos a cuncàmbia intre Pakistan e Afghanistas de sas oras in antis. Ma nos ant fatu deretu a cumprèndere chi cussas ragàglias fiant petzi su preàmbulu de una crisi regionale prus manna. Tzertu, l’ischìamus chi podiat sutzèdere su chi nos ant presentadu ischidende·nos·nde. E ischìamus finamentas chi chie faeddat de “peace”, posca a sa “war” bi lompet cun fatzilidade manna.
S’interventu israelo-americanu de sos concruos de freàrgiu, afutende·si·nde de su Ramadham, no at tardadu a si manifestare cun totu sa fortza distrutiva sua. Sas tratativas si sunt firmadas in unu binàriu mortu. Sa diplomatzia est prus morta de su binàriu. E si s’Onu est oramai s’umbra de issa matessi, su “board” de cussa “peace” no est unu sole chi allughet ma chi brujat ebbia.
Como, però, si sa mirada nostra nche bàrigat su fumu de sas esplosiones, acò chi essit a campu cussa dissonàntzia seletiva chi règulat s’apartenèntzia nostra a s’otzidente e a sos valores suos (cale si siat cosa custu chèrgiat nàrrere). S’indignatzione pro su programma nucleare de Teheran faghet a pùngios cun su mudìmene insurdadore in contu de arsenales atòmicos giai esistentes (e nemos paret chi potzat faeddare de sos de Israele). Su diritu a sa difesa e a sa deterrèntzia est unu cuntzetu a geometria variàbile.
De sa matessi manera, sa retòrica de sa democratzia comente prerechisitu pro su diàlogu isvanesset pro regimes assolutistas che a su de s’Aràbia Saudida o de àteras petromonarchias. Cusos atores, mancari cumpartzende cun s’Iran istruturas de poderiu a tesu meda dae sa democratzia (liberale o mancu), abarrant partner privilegiados.
Cantas bortas amus naradu “Donna, vita, libertà”? Si narat chi pro custas bombas siat mortu s’Ayatollah Khamenei. Ma una de sas primas novas chi amus intesu e lèghidu pertocat unas 50 fèminas mortas in un’iscola.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
