Sàbadu su 25 de abrile 2026 su “Gruppo Old Cars Friends” at festadu su de bìndighi anniversàrios de sa fundatzione sua cun un’eventu ispetziale acasagiadu acanta s’Orange Marina Padel Club, in s’orumare de Su Siccu, a pagu treru dae su Parco Nervi.
Unu traguardu importante pro una realidade nàschida in su 2011 dae s’initziativa de unu grupu de amantiosos, a comintzu ligados mescamente a sa Citroën chi posca ant crèschidu fina a acollire propietàrios de veturas istòricas de diversos màrchios. Giai dae is esòrdios, su grupu s’est distintu pro valores comente s’amighèntzia, s’unione e una passione cumpartzida pro su motorismu de època.
In is annos, su “Gruppo Old Cars Friends” at pigadu parte a maicantos eventos dedicados a is apassionados de veturas istòricas in Casteddu e in is biddas de ingìriu, devenende una presèntzia reconnoschìbile in su panorama regionale. Unu piessignu de sa truma est sa significativa partetzipatzione feminile, elementu non semper iscontadu in su setore.
Sa crèschida de su grupu est istada contina: sòtzios noos, veturas noas e una presèntzia semper prus importantes in manifestatziones de bàlia, ue a s’ispissu at otentu reconnoschimentos pro su nùmeru de partetzipantes, s’elegàntzia de is veturas e su valore istòricu de is esemplares espostos.
Is veturas de su grupu – chi andant dae is annos Trinta finas a is annos Noranta, intre berlinas, coupé, spider, isportivas e cabriolet – non sunt petzi ogetos de colletzione, ma beras protagonistas de eventos culturales. Difatis medas ddas ant impreadas in set tzinematogràficos, isfiladas de elegàntzia e servìtzios fotogràficos, contribuende a contare s’istòria de sa vetura.
De contu fintzas s’impinnu in su sotziale: su grupu collàborat cun Comunos, assòtzios culturales, Prolocos e entes religiosos, partetzipende a initziativas de benefitzèntzia e solidariedade.
In is ùrtimos annos, su “Grupu Old Cars Friends” at pigadu parte fintzas a manifestatziones de rilievu natzionale comente Ruote nella storia, promòvidu dae s’Automobile Club Italia, cun sa punna de avalorare su patrimòniu automobilìsticu istòricu e promòvere turismu, cultura e traditziones locales.
Dae pagu, is veturas de su grupu sunt istadas protagonistas fintzas de sa tzerimònia de partèntzia de su Rally de Casteddu, cun un’espositzione in sa Pratza dei Centomila e un’isfilada a pustis de s’inghitzu de sa gara.
S’addòbiu de su 25 de abrile est istadu un’ocasione ùnica pro su pùblicu: durante s’espositzione in s’Orange Marina Padel Club, is visitadores ant ammiradu calicunu de is modellos prus rapresentativos de su grupu, esempleres unico de s’istòria de s’automobilismu italianu e internatzionale. Unu biàgiu in su tempus intre veturas icònicas, a s’ispissu difìtziles de agatare. Pro nd’ischire de prus Instagram: @oldcarsfriends
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
