Sàbadu coladu, una rapresentàntzia de sa Regione Sardigna, a pustis de sèighi annos, est torrada a Germània pro adobiare is comunidades de is sardos emigrados. S’addòbiu dd’ant fatu in ocasione de s’inghitzu de s’Annu de s’Emigratzione Sarda in Germània, initziativa promòvida dae sa Giunta regionale in intro de su Programa Annuale Emigratzione 2026, cun sa punna de afortiare su diàlogu cun una de is comunidades sardas prus mannas e ativas de Europa.
Sa duas dies de addòbios, acasagiada in Berlinu, at reunidu a pare is rapresentantes de is oto tzìrculos sardos presentes in Germània – Berlinu, Amburgu, Francuforte, Istocarda, Moers, Mönchengladbach, Oberhausen e Wolfsburg – paris cun sa Federatzione de is Assòtzios Sardos in Germània (FAES), ghiada dae su presidente Paolo Atzori.
A rapresentare sa Regione fiant presentes Annalisa Flore, Segretària particulare de s’Assessoradu de su Traballu, Formatzione Professionale, Cooperatzione e Seguresa Sotziale, Veronica Nedrini, Adetu de Imprenta, Ignazio Boi, Referente Emigratzione de s’Assessoradu, Giorgio Biddau, Diretore Servìtziu Cooperatzione, Tertzu Setore e Polìticas de Incroimentu, Angela Madeddu, Referente de is Tzìrculos Sardos in Germània de su Setore de is Polìticas Migratòrias, Marco Sechi, Responsàbile de su Setore de is Polìticas Migratòrias.
S’assessora de su Traballu Desirè Manca no at pòdidu partetzipare in presèntzia pro more de impinnos istitutzionales, ma est intervènnida cun unu messàgiu in videocunferèntzia acantu at torradu gràtzias a is tzìrculos de is emigrados sardos pro s’impinnu contunu issoro in sa promozione de sa Sardigna in àmbitu europeu e mundiale.
«Ais fraigadu pontes, ais giutu a Germània su respetu e is valores de s’Ìsula nostra, devenende unu modellu de integratzione. Si oe sa Sardigna est connota e apretziada in Europa ddu depimus fintzas a bois. Is tzìrculos bostros sunt s’espressiones de s’identidade sarda e rapresentant unu patrimòniu umanu chi sa Regione at a sighire a sustentare».
Manca at ammentadu fintzas s’istòria de s’emigratzione cara a sa Germània, cumintzada in is annos Chimbanta e Sessanta, cando mìgias de sardos aiant lassadu s’Ìsula pro traballare in is minas de sa Ruhr e in is indùstrias tedescas, afrontende sacrifìtzios mannaos, sena però mai pèrdere su ligàmene cun sa Sardigna.
Durante is traballos s’est discutidu mescamente de su benidore de s’assotziatzionismo sardu in s’èsteru, de su ricàmbiu generatzionale e de s’interessu de is giòvanos. Pro custu motivu est istadu organizadu unu cunfrontu cun su Coordinamentu Giovani de sa FAES, deretu de nàschidu pro favorire sa partetzipatzione de is levas noas a sa vida de is tzìrculos.
Non sunt mancados is addòbios istitutzionales cun su cussigeri delegadu de s’Ambasciada de Itàlia in Berlinu e cun su presidente de su Comites, Federico Quadrelli, pro afortiare sa collaboratzione in favore de is comunidades italianas residentes in Germània.
Intre is interventos prus significativos su de Gianni Masia, vitzepresidente de sa FAES e presidente de su Tzìrculu Sardu de Amburgu.
«So cuntentu meda a beru de s’addòbiu chi amus fatu in Berlinu. Fiant bìndighi annos chi non si faghiat unu cunfrontu de custu livellu cun una delegatzione de sa Regione Sardigna. Sa delegatzione regionale fiat manna meda, e custu dimustrat s’atentzione cara a is tzìrculos. Amus afrontadu is problemàticas comunas e su resurtadu prus importante est sa voluntade de traballare unidos pro chi is tzìrculos potzant sighire a bìvere e operare ancora pro tempus meda».
Satisfada meda fintzas de Cinzia Marongiu, vitzepresidentas de su Tzìrculu “Maria Carta” de Francuforte, chi at bòlidu ringratziare sa Regione Sardigna, sa FAES e su Tzìrculu de Berlinu pro s’organizatzione de s’addòbiu, mescamente a Lorenzo Deidda, Vitze-Presidente e parte de su grupu giòvanos sardos Sara Pacchini.
Sa presidenta de su tzìrculu de Francuforte, Tiziana Deidda, at sutaliniadu s’importu de su cunfrontu intre is assòtzios.
«Amus fatu un’addòbiu bellu meda, cun sa partetzipatzione de belle totu is tzìrculos de sa Germània. Amus presentadu is progetos nostros e allegadu de su ruolu de is fèminas. S’obietivu est de collaborare cun su coordinamentu de is Fèminas Sardas in Sardigna, creende una rete istàbile. In prus amus faeddadu de is initziativas pro annu chi benit dedicadas a sa longevidade, a sa salude e a sa valorizatzione de sa cultura sarda».
Unu momentu emotzionante dd’at regaladu sa cantante Sandra Ligas, chi at interpretadu Su Pitzinneddu. «Non fiat prevìdidu de cantare eo, ma m’at fatu meda pràghere pòdere dare unu pagu de colore de Sardigna dae in antis is rapresentantes de is tzìrculos sardos de sa Germània».
Positivos fintzas is cummentos de is àteros rapresentantes de is tzìrculos.
Pro Antonello Serra, presidente de su Tzìrculu Sardigna Europa de Moers, «s’addòbiu est istadu positivu suta totu is aspetos e nos auguramus chi potzat prodùere resurtados cuncretos».
Piero Casu, rapresentante de su tzìrculu de Wolfsburg, originàriu de Furtei e emigradu in Germània dae su 1981, ue at traballadu in s’istabilimentu Volkswagen, at nadu de èssere satisatu meda pro su diàlogu aviadu. «Pro a mie custa est un’esperièntzia bona. Isperamus però chi siant ascurtadas is rechertas nostras e chi sa Regione sigat a finantziare is initziativas de is tzìrculos».
De sa matessi idea fintzas Paoletto Farris, de su Tzìrculu Eleonora di Arborea de Mönchengladbach, originàriu de Gonnoscodina. «S’atopu est istadu positivu. Pro fortuna sa Regione est sighende a nos agiuare, sinunca medas tzìrculos diant àere giai serradu. Nois devimus fàghere sa parte nostra, sighende a collaborare e a presentare progetos e documentatzione».
In fines Franco Sogus, de su Tzìrculu Sardu de Oberhausen, at evidentziadu s’importu de sa presèntzia istitutzionale.
«A banda sa basca, sa Regione at fatu bene a bènnere oe a Berlinu. Ddoe at medas chistiones de afrontare e nos auguramus chi arribbent risursas noas pro sustentare is progetos nostros».
S’addòbiu de Berlinu no est istadu petzi una tzelebratzione de s’emigratzione sarda, ma fintzas un’ocasione pro afortigare is raportos intre sa Regione e is comunidades sarda in s’èsteru. Sa punna cumpartzida dae totus est de donare prus valore a su ruolu de is tzìrculos e su patrimòniu fraigadu in is annos, in prus fàghere interessare semper prus is giòvanos, pro chi devèngiant su ponte intre sa Sardigna e s’Europa de su futuru.
