Aristanis, su fèstival Dromos abetat sa cantante israeliana Noa

Cun su cuntzertu de Omar Sosa si cumpletat sa tres dies in Ortueri cun su cale su fèstival Dromos at inauguradu sa de bintitrès editziones suas, chi at a sighire finas a sa metade de austu in sos àteros tzentros de su tzircùitu suo: Aristanis, Baulau, Crabas, Fordongianus, Sant’Eru e Bàini, cun un’apenditze su 28, a Neunele.

A pustis de Ortueri, Dromos arribbat a sa Aristanis sua, pro àtera tres dies. Difatis, dae lunis su 2 de austu at a acasagiare in s’Antiquarium Arborense su giornalista e iscritore Francesco Abate chi, paris cun su giornalista Jimmy Spiga, at a presentare s’ùrtimu romanzu suo, “I delitti della salina”. Su traballu, imprentadu dae Einaudi Stile Libero, est unu romanzu ambientadu in sa tzitade de Casteddu, e contat sos fatos de sa giornalista Clara Simon, pintende una tzitade esòtica e inèdita, dae sas salinas a su ‘Bagno penale’, dae su burdellu a su teatru de s’òpera finas a sa marina de su Poeto. Una tzitade imboligada dae un’atmosfera de ‘feuilleton’, chi caturat e trìulat sos letores cun sos segretos misteriosos suos.

Martis su 3 de austu Aristanis at a èssere protagonista de sos apuntamentos prus abetados de sa fèstival: Noa, s’artista prus chircada e rapresentativas de su paisu suo. Sa cantante israeliana at èssere acumpangiada dae su chiterrista Gil Dor e dae una setzione rìtmica formada dae Ruslan Sirota a su pianoforte, Or Lubianiker a su bassu elètricu e Gadi Seri a sa bateria, pro presentare s’ùrtimu progetu discogràficu suo, su primu in crae jazz: “Afterallogy”.

Sos apuntamentos de Dromos a Aristanis si cumpletant mèrcuris su 4 de austu, cun su sassofonista Rosario Giuliani, protagonista in su merie a tardu de una masterclass in s’Hospitalis Sancti Antoni e posca, e a su sero, cun unu cuntzertu in cumpangia de su triu de su baterista Alessandro Cau, Tancredi Emmi a su contrabbassu e Gianfranco Fedele a su pianoforte.


Atividade realizada cun su contributu de sa Regione Sardigna – Imprentas 2020-2021. Lr 22/2018, art. 22
Attività realizzata col contributo della Regione Sardegna – IMPRENTAS 2020-2021. LR 22/2018, art. 22

T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.

Iscrie pro primu

Cummenta

Sa mail non at a èssere publicada


*