Dae sa passione pro sa terra nostra naschet sa prima retza sotziale de su turismu pensadu dae beros amantiosos de s’ìsula pro chie istimat s’ìsula. Sardinia Itineraries est sa prima prataforma a s’indonu de itineràrios in Sardigna. Unu mundu virtuale chi donat a sos impitadores suos itineraràrios ispetzìficos segundu sos bisòngios e passiones issoro. Escursiones a s’iscoberta de sos logos prus pagu connotos, bìsitas in sas biddas prus ammajadores ma fintzas mustras, museos, sitos archeològicos.
Unu disafiu pro sos duos fundadores de custu progetu, sòtzios ma prus che totu amigos dae bìndighi annos, chi cumpartzint un’amore istremenadu pro custu logu chi dae semper ant mutidu domo: “Cherimus contribuire a sa valorizatzione de sa Sardigna, cussigende semper logos noos e a foras de su tzicuitu cunventzionale.
S’idea nostra est cussa de interessare totus cussos turistas chi ammaniant sas vacàntzias issoro prenotende metas larganas, sena ischire chi sas meravìllias chi fiant chirchende fiant suta de su nasu issoro”. A faeddare est Enrico Ivan Pusceddu, chi dae sos contos de sas retzas sotziales promovet e contat su territòriu nostru a prus de 70 mìgia impitadores.
“Sos cussìgios de sa comunidade chi Enrico at creadu in prus de deghe annos – contat Jacopo Cogoni, impinnadu in su setore publitzitàriu – sunt istados sa base de partèntzia de custu progetu. Nos semus dimandados comente fòghere a avalorare totu s’esperièntzia madurada in annos de retzas sotziale e comente dare una risposta lestra a chie teniat semper prus fàmene de logos e esperièntzias. Intendìamus chi b’aiat su bisòngiu de creare unu trastu chi avaloraret su territòriu ma chi esseret a beru a sa portada de totus e chi interessaret unu fàscia de mercadu semper prus giòvana ma cussentziosu”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
