Sa bidda de Fonne pranghet pro s’iscumparta de Michele Coinu, Marco Innocenti, Michele Soddu e Lorenzo Figus, agatados sena vida a pustis de oras de chircas. Sa sìndiga at proclamadu su lutu tzitadinu.
Tristura manna in Fonne pro sa morte malassortada de bator giòvanos de sa bidda, chi ant pèrdidu sa vida in un’intzidente in s’istrada Provintziale 69, sa chi andat a s’arcu de Caravai, sa ghenna pro s’Ogiastra. Michele Coinu, 21 annu, Marco Innocenti, 18 annos, Michele Soddu, 22 annos,e Lorenzo Figus 17 annos, los ant agatados mortos a pustis de medas oras de chircas.
S’intzidente diat pòdere èssere acontèssidu pagu a pustis de sas 17.30 de mèrcuris. Sos familiares, iscrètidos ca non fiant galu contoniados a domo, a inghìriu a sas 20 ant fatu gente pro los chircare, ma pro de badas. A sa coa ant donadu s’avisu a sa caserma de sos carabineris e bia mesunote, s’iscoberta: sa vetura, una Fiat Punto, est istada agatada isciusciada a fundu de un’isperrumadòrgiu, suta unu tretu de caminu sena de barrieras: a dolu mannu, pro sos bator piseddos non b’aiat nudda de fàghere.
Sos giòvanos traballaiant totus in su casifìtziu e salumifìtziu de sa famìlia de sa sìndiga Daniela Falconi chi, in unu messàgiu cummovente in sa retza, at iscritu custos faeddos de dolu: “Unu dolore tropu mannu, unu mudìmene bisestradu in cada corrungrone de sa bidda. Amus a tènnere bisòngiu de ognunu de nois pro imprassare a forte sas famìlias e donare consolu a sos amigos.”
Michele Coinu, Marco Innocenti, Michele Soddu e Lorenzo Figus fiant amigos dae minores: fiant semper paris e in prus de su traballu cumpartziant sa passione pro sos caddos.
Totu sa comunidade de Fonne est in anneu pro more de custu acontessimentu malu. Sa sìndiga at proclamadu su lutu tzitadinu pro oe, su primu de santandria. Eris a merie, unas 2000 persones ant partetzipadu, a sa muda, a una protzessione cun sas istiàricas dae sa crèsia parrochiale de Santu Giuanne a sas domos de sos pitzocos vìtimas de s’intzidente.
In custas oras, sas pàginas sotziales de comunos e entes istitutzionales de totu sa Sardigna sunt in corrutu, comente sinnu de partetzipatzione a su dolore de sa comunidade de Fonne.
Sos interros s’ant a tzelebrare oe, in sa Basìlica de sos Màrtires a ora de sas 15:30.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
