Dae su 5 a su 7 de onniasantu e dae su 5 a su 6 de mese de idas sa de tres editziones de sa manifestatzione ponet cara a cara sardu, catalanu, friulanu e francuproventzale. In programa atopos literàrios, presentadas editoriales e una dibata in contu de su ruolu de is limbas minoritàrias in su fràigu de sa paghe.
Ite contributu podent donare is limbas minoritàrias in sa cumprensione de is cuntierras e in su fràigu de sa paghe? Custa est sa pregonta a su tzentru de sa de tres editziones de “Officina delle lingue minoritarie”, in programa in Cuartu Sant’Aleni dae su 5 a su 7 de onniasantu e dae su 5 a su 6 de mese de idas 2026.
Sa manifestatzione at a fàghere atopare istudiosos, iscritores e rapresentantes de is comunidades linguìsticas sarda, catalana, friulana e francuproventzale, proponende unu meledu in contu de su raportu intre limba, identidade, gherras e tensiones internatzionales. Sa punna est de avalorare su puntu de annotu de is culturas minoritàrias, abituadas in manera istòrica a si cunfrontare cun situatziones de làcana, dominatziones e resistèntzia culturale.
Su programa cumentzat giòbia su 5 de onniasantu, a ora de is 17, in sa Sala dell’Affresco, de s’ex Cunventu de is Paras Caputzinos, cun sa presentada de sa tradutzione in catalanu de su poema sufi La conversa dels ocells di Farid Udd Din Attar, fata dae Carles Duarte i Montserrat, chi at a rejonare cun su filòlogu sardu Maurizio Virdis. Sa serada at a sighire cun sa presentada de s’òpera bilìngue Un padre aveva due figli de Sandro Dessì, chi at allegare cun Giusy Fanti.
Chenàbura su 6 de onniasantu est dedicadu a s’istòria e a sa literadura sarda. In programa sa presentada de sa graphic novel dedicada a Amsicora, cuncordada dae Massimiliano Pala cun sa versione in sardu de Angelo Canu, e de su volùmene Padre Cubeddu in sa terra de sa poesia, de Luca Maurizio Atzori e Graziano Fois, cun su contributu de su filòlogu e curadore editoriale Giancarlo Porcu.
Sàbadu su 7 de onniasantu, dae is 10, su programma s’aberit cun su Cantieri de sa limba sarda, dirìgidu dae Lucia Cossu. S’atopu at a interessare amantiosos, istudiosos, artistas e iscritores, chi ant a cumpartzire esperièntzias e propostas pro su megioru de is polìticas linguìsticas dedicadas a su sardu.
Sa segunda sessione inghitat su 5 de mese de idas, in is ispàtzios de Sa Dom’e Farra, cun su laboratòriu Scrittura e letteratura di confine negli idiomi non statali: Catalogna, Piemonte, Friuli. At a sighire sa mesa de rejonu La lingua della pace è in minoranza? Friuli-Sardegna: due casi a confronto, dedicada a su ruolu de is limbas minoritàrias in sa promotzione de su diàlogu e de sa cunvivèntzia. Sa serada si serrat cun sa premiatzione de Bachis Medde, libraju de Bilartzi chi in su 2026 at giradu cun sa faina culturale viagiante cosa sua in unas chimbanta de biddas sardas.
Domìnigu su 6 de mese de idas, a ora de is 18.30, in sa Sala dell’Affresco de s’ex Cunventu de is Paras Caputzinos, is traballos si concruint cun sa presentada de su libru Tra le mie corde, de Maria Gabriella Ledda, intregadu a su caminu artìsticu de Mauro Palmas, sighida dae unu cuntzertu de su mùsicu.
