S’intìtulant ‘Ranas’ de Daniele Arca e ‘Arrivano i venusiani’ de Antonello Deidda sas pellìculas noas in limba sarda prodùidas dae s’assòtziu culturale Babel in collaboratzione cun sa Sotziedade Umanitària-Cineteca Sarda gràtzias a su Prèmiu Kentzeboghes cun sa diretzione artìstica de su regista Paolo Carboni. Su prèmiu naschet pro promòvere su tzìnema in sardu e in sas àteras limbas minoritàrias faeddadas in Itàlia.
Sas pellìculas curtzas realizadas in su 2022 ant a èssere projetadas, a sa presèntzia de sos registas, giòbia 1 de nadale partende dae sas 20 in su Teatru Massimo de Casteddu in su cursu de sa serada finale de sa de chimbe editziones de su Prèmiu. Durante s’eventu, presentadu dae Elio Turnu Arthemalle, ant a èssere fintzas annuntziadas sas iscenegiaduras binchidoras de s’editzione noa de su Prèmiu chi s’annu imbeniente s’ant a trasformare in film. Sa serada s’at a concruire cun su cuntzertu ‘Imaginary lines’ de sos mùsicos Emanuele Contis (sassòfonos & electronics), Gavino Murgia (sassòfonos) e Nanni Gaias (bateria).
‘Ranas’ (20’) est ambientadu in una tzitade de sa provìntzia de su Sud Sardigna ue duos pitzocos si atobiant a pustis de s’iscola pro pro assistire a un’eclisse partziale de sole. In unu percursu metafòricu chi los at a comintzare a sa vida de sos mannos, sos duos amigos ant a afrontare unos cantos disafios.
‘Arrivano i venusiani’ (35’) nche giughet imbetzes in sos primos annos Setanta cando subra de sa marina de Giorgino bator amigos sunt gioghende a scialandrone suta de s’ombrellone. Dae sa radiolina s’intendet una boghe chi annùntziat s’arribu de sos venusianos in Casteddu. Sa noa est dada dae sa redatzione de unu giornale ue Mandrake, bèciu e iscuru giornalista, e Diabolik, giòvanu antennista, cuncordant una trufa. Ma s’annùntziu de s’arribu de sos extra-terrestres at a causare non pagos problemas…
Su Prèmiu Kentzeboghes, chi at otentu s’importante reconnoschimentu de s’Artu Patrotzìniu de su Parlamentu europeu, in sos annos s’est cunfirmadu una novidade de importu mannu in su panorama tzinematogràficu de sas limbas minoritàrias, insertende·si (fintzas gràtzias a sa collaboratzione cun sa Regione Autònoma de sa Sardigna, cun sa Fundatzione de Sardigna, entes pùblicos e sugetos privados) in unu percursu finalizzado a s’amparu de su patrimoniu linguìsticu de sas comunidades. S’Assòtziu Babel dae annos traballat pro fàghere crèschere e consolidare una rete internatzionale cun organizatziones culturales e istitutziones pùblicas chi potzant in manera traballare pro sa promotzione de su tzìnema in sas limbas minoritàrias in su respetu de su multilinguismu e de sos deretos de sas minorias.
Ocannu sunt istadas diferentes sas fainas giutas dae in antis in Sardigna. Intre sas printzipales b’at sos laboratòrios iscolàsticos pro sos alunnos de sas iscolas subra de su limbàgiu tzinematogràficu e subra de sas tècnicas de produtzione, addòbios didàticos cun sa projetzione de film (cun temàtica ligada a sa sustenibilidade ambientale) ultres a workshop in paris cun su Cunservatòriu de Mùsica de Casteddu.
Non fartant addòbios formativos a distàntzia dedicados a sas limbas minoritàrias, a s’istòria de su tzìnema sardu e a s’iscritura tzinematogràfica a traessu de su giassu www.babeltv.org. In prus pro su segundu annu b’est istada in Casteddu sa rassegna ‘Nosu e is atrus’ durante sa cale sunt istados projetados unos cantos film in limba minoritària seberados intre sos chi in sos ùrtimos annos ant partetzipadu a su Babel Film Fèstival (siat sardos chi natzionales e internatzionales) a su fine de pònnere a cunfrontu sas produtziones tzinematogràficas sardas cun cuddas realizadas in unas àteras limbas minoritàrias de totu su mundu.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
