Magumadas est una biddixedda bella de sa Planàrgia acanta a Bosa in su territòriu de Aristanis. Fintzas a una pariga de chidas fait no teniat meda tretu in is giornalis, ma dae candu s’est aberta sa chistioni de s’àliga, su nomini de custa bidda est acabau meda bortas in is giornalis, online e a sa televisioni.
Provaus a biri comenti est andada s’istòria. Su 16 de su mese de idas Mauro Pili, ex deputau po meda annos in paris cun Forza Italia de Berlusconi, ex presidenti de sa Regioni (dae su 2001 a su 2003) e immoi meri de su movimentu Unidos, at publicau unu video e unu post in nue narait chi in Magumadas fiat arribendi s’àliga, ludus de sa bassa, dae àtras regiones italianas comente Campania, Puglia e Lazio. “D’ònnia dì dae su portu de Terranoa e de Casteddu arribant in Sardigna camion prenus de ludus de sa bassa chi sunt bisastrendi sa popolatzioni. Sa Sardigna comenti a sa terra de is fogus”.
In su video, acumpangiau cun una musica thriller, si bit unu camion chi ghettat a terra unu sciacu mannu de cosa. Sa nova fait su giru de su web, de sos telefoneddus cun Whatsapp e Facebook e arribat a is giornalis chi dda publicant. Sa chistioni immoi est mediatica: in is social network nc’est meda gente arrennegada e medas polèmicas arribadas fintzas in su Consigliu regionali cun una interrogatzioni de sa minorantzia.
Cussas fatas dae Pili po immoi abarrant acusas totu de demustrai. De seguru no sunt pràxias a sa societadi chi in Magumadas traballat in su giassu po tramudai s’àliga. Sa Geco Srl chi aici respundit a su clamore mediàticu: “Seus a regula e traballaus no po destrugi s’àliga ma po dda recuperai. Innoi no nc’est aliga perigulosa e nemmancu iscòrias”.
Mancai custa respusta, Pili no s’est firmau: at fatu un’espostu a sa Procura po cantu pertocat su tretu minimu chi diat depit essi tra su centru de sa bidda e s’impiantu de traballu de s’àliga.
In prus, sa note de su 31 de nadale est iscopiau unu fogu pròpiu in s’azienda de Magumadas: at destrutu duos generadores, s’òrigine podit essi po mori de calicunu. E puru in custa situatzione is polèmicas no fartant. Di fatis sa Geco at denunciau su clima de “linciàgiu” fatu contra a s’azienda. E Pili at nau su contrariu. (at a sìghi)
