Su slogan de sa Regione pro sos cuntzertos de su 31 de nadale fiat “Tutta un’altra musica”. Ma s’annu nou est comintzadu in una manera chi li deghet de prus sa zeppeliniana “The song remains the same”.
Movamus dae una pregonta: a beru pensamus chi sa Sardigna si potzat «candidare a èssere sa protagonista italiana de s’annu nou in pratza»? E lassemus·nche fintzas a banda sa chistione de èssere protagonistas italianos, sende chi non podimus pretèndere una visione prus larga a chie est italianu in Sardigna.
A beru pensamus chi unu turista “del resto della penisola” nche potzat cròmpere a custa terra male collegada pro colare duas oras ascurtende·si a Gabry Ponte (chi at “sonadu” in «Tutta l’Italia, tutta l’Italia, tutta l’Itali-a») e a àteros che a Giusy Ferreri, a J-Ax, a Marco Mengoni, a Raf, a Ghali, a Elio e le Storie Tese, a Fedez, a Achille Lauro, a Max Pezzali?
In sìntesi sas pratzas fiant prenas, ma de sardas e de sardos chi bident in custas initziativas sa possibilidade de leare parte a unu “live” de importu sena pagare billete.
Sos contos cherent lassados a chie ischit carculare cantu si gastat e cantu torrat; petzi custos podent nàrrere si b’at àpidu investimentos dèghidos o dinare imboladu.
S’allega est un’àtera. Cantu cheret investire sa Regione pro s’iscena musicale sarda? Inoghe tocat de arresonare mirende a unu perìodu prus mannu ma dende atentzione pro chi custu tempus non siat longu meda (naraiat Keynes chi «in su perìodu longu semus totu mortos»).
Pro seguru tocat a intervènnere a prus livellos, dae cussu formativu-compositivu (fintzas colende dae sas iscolas tzìvicas chi cherent ispainadas e potentziadas) a cussu esecutivu-logìsticu (cun salas proas e de registratzione gratùitas).
Ma tocat fintzas a cumprèndere (e custu tocat a nois) su proite fintzas in sas festas biddaresas non podimus fàghere a mancu de aprontare unu palcu a s’artista “nazionale” (sena su tz) che chi non b’aeret festa in mancàntzia sua.
Torrende a sos Led Zeppelin, «City lights are oh so bright, as we go sliding, sliding, sliding». Ma est pròpiu como, a luminàrias morende·si·nche, chi tocat a nd’allegaremus.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
