Cunsòrtziu Turìsticu Ogiastra Blue Zone: una rete de operadores pro unu turismu partetzipadu e cumpartzidu.
Su 30 làmpadas 2024, in Tortuolì, est istadu costituidu su Cunsòrtziu Turìsticu Ogiastra Blue Zone, frutu de meses de addòbios e de traballu. S’organismu nou punnat a istantargiare una rete de operadores de su setore turìsticu pro promòvere unu turismu partetzipadu e cumpartzidu. Sos sòtzios fundadores sunt ses, totus operadores ogiastrinos de diversos setores turìsticos: Cristian Pinna, amministradore de su portale turìsticu Life in Sardigna; Alberto Giacobbe, titulare de s’agèntzia de biàgiu Ogliastra Incoming; Andrea Franceschi, professionista de su setore turìsticu; Alessandro Murino, operadore turìsticu e ghia ambientale; Stefania Carta, titulare de s’Hotel Janas de Tertenia; e Cristiano Carta, fundadore de su progetu Instagram Costa di Baunei.
Su Cunsòrtziu naschet cun s’idea de fàghere rete e de allonghiare e diferentziare s’oferta turìstica. Custu progetu est cumentzadu in 2020, cun su làntziu de “Ogliastra comunità accogliente e sustenibile”, finantziadu dae Sardegna Ricerche. Oe, cun sa costitutzione de su Cunsòrtziu, sunt giai lòmpidas rechestas de adesione de àteros 15 operadores de su setore turìsticu ogiastrinu. Dae pagu su progetu at retzidu s’aprovatzione de su Ministèriu de sas impresas e de su “Made in Italy” pro su depòsitu de su marchi Ogiastra Blue Zone.
“Semus cumbintos de s’importàntzia e de sa netzessidade de custu Cunsòrtziu,” ispiegant sos fundadores de su Cunsòrtziu Turìsticu Ogiastra Blue Zonas. “Si tratat de unu sugetu giurìdicu prus forte chi nos at a permìtere de partetzipare a diversas initziativas. Semus traballende a unu progetu triennale chi amus a presentare in atòngiu, chi previdet de ofèrrere sustennu territoriale a sas impresas de su turismu, pònnere in rete sos servìtzios nostros giai ativos e programare a s’istajone imbeniente. S’obietivu est èssere prontos e operativos intro su mese de abrile 2025.”
Su Cunsòrtziu si proponet in prus de èssere su bratzu operativu de sa DMO Ogliastra (Destination Management Organization), un’organismu a partetzipatzione pùblica e privada, e de poderare unu diàlogu continu e profetosu cun sos comunos ogiastrinos. In custas dies est prevìdidu un’addòbiu cun s’assessore regionale nou a su turismu.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
