In Pau, bidda de 300 bividores in provìntzia de Aristanis, in sa regione istòrica de s’Arta Marmidda, ddoe tenet un’àndala incantadora, imbèrghida in su coro de su Monte Arci, chi aunit arte, natura e memòria antiga: Un Bosco da Fiaba. Est un’itineràriu naturalìsticu e artìsticu prenu de òperas misteriosas de linna in intro de su Parcu de s’Ossidiana, unu beru museu a s’abertinu insertadu in su Parcu Geomineràriu Istòricu Ambientale de sa Sardigna, reconnotu dae s’UNESCO.
Su percursu de Un Bosco da Fiaba naschet in su pinedu de Sennixeddu e curret pro unos tres chilòmetros in mesu a opinos, èlighes, liones, pinnas artas de predamolina e bucones de bidru vulcànicu. Is òperas — unu lupu, unu mariane, unu cherbu, una mongolfiera, una tzonca mutida Chiù Chiù, etc.— ddas ant fatas artistas sardos e istràngios, e sunt pensada pro dialogare cun s’ambiente chi ddas inghìriat. Cada annu, artistas noos lòmpent a Pau, e cuncordant installatziones noas cun is materiales chi s’agatant in padente.
Pensadu dae s’Assòtziu culturale Menabò e dae su Museu de s’Ossidiana de Pau, su progetu est nàschidu in su beranu de su 2022 comente forma de valorizatzione sustenìbile de su territòriu. Su bisitadore no agatat indicos detalliados fatu de s’àndala, si non su contu de is “pau rangers”, comente si mutint in ghias de su parcu. S’esploratzione est parte de s’esperièntzia, intre ispantos, iscobertas e immersione sensoriale in una natura generosa. Unas cantas òperas, difatis, si lassant iscobèrrere petzi a chie sèberat de abrandare su passu e afinare sa mirada.
Su tratzadu colat in parte in su Caminu de s’Ossidiana, “Sa Scala Crobina”, acanta galu oe faghent a bìdere is ofitzinas neolìticas de traballadura de su bidru nieddu vulcànicu. Inoghe, dae millènnios, s’òmine at trasformadu sa materia prima in aianas, gorteddos, puntas de fritzas e ogetos de iscàmbiu, faghende de Pau unu de is tzentros prus importantes pro sa trasformatzione de s’ossidiana in su Mediterràneu.
A contare sa nàschida e sa bisione de su progetu est Giulia Balzano, imbentora e curadora de su percursu, ghia ambientale escursionìstica, ogiastrina de Tortolì cun famìlia originària de Àrthana. «Amus imaginadu custu logu comente unu libru iscritu in su padente, ue is òperas no invadent sa natura ma chistionant cun issa. Est unu percursu chi sotat su bisitadore a andare a bellu, a abrandare su passu, a castiare mègius, a contivigiare su padente e is mudìmenes suos. Est un’esperièntzia de bìvere cun atentzione e meravìllia», ispiegat Giulia, oe fintzas responsàbile de sa gestione noa.
Dae su 2025, difatis, Unu Bosco da Fiaba est devènnidu unu progetu isperimentale de gestione sustenìbile, cun billeteria ativa in is fine de chida, eco-imposta solidale incluida e carta fidelidade pro chie torrat a bisitare su parcu. S’iscopu est de amparare s’ecosistema megiorende is servìtzios pro is bisitadores. Su Comunu de Pau, paris cun Menabò, punnat de custa manera a fàghere de su custu padentinu de opinos unu motore de crèschida culturale, sotziale e econòmica.
In s’istade, su percursu est abertu cada sàbadu e domìnigu cun oràriu continu dae is 9 a is 19. S’intrada costat 5 èuros (reduidu 4 èuros), cumprensivu de s’eco-imposta solidale istituida dae su Comunu de Pau. Cun una agiunta de 3 èuros, sunt disponìbiles duas bìsitas ghiadas de 90 minutos in su percursu de Arte in Natura, a is 11 de mangianu e a is tres de merie.
Pro nde ischire de prus e pro prenotare una bisita faghet a iscrìere a su nùmeru WhatsApp 340 6110153 o a s’indiritzu associazioneculturalemenabo@gmail.com.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
