Orgòsolo s’est preparende a una die de grandu importu gràtzias a una faina culturale e sotziale chi naschet dae su chi sa comunidade at fatu e produidu in s’istòria sua.
Su 7 de austu b’est difatis s’inauguratzione e sa presentada de sa rete museale de sa bidda. S’initziativa rapresentat s’acumprimentu de su progetu ‘Orgosolo racconta l’altra faccia della Sardegna – Miradas, Sonos, Radichinas’, finantziadu tràmite su Pnrr Borghi – Lìnia B cun su sustegnu de su Ministeru de sa Cultura e isvilupadu fintzas cun sa consulèntzia de su Museu Egìtziu. Su percursu proponet un’immersione profunda in s’identidade barbaritzina.
Si comintzat dae ‘Radichinas’, su museu de sas raighinas, ue s’istòria agropastorale e sas batallas istòricas pro sas terras comunes andant a manu tenta cun su paesàgiu ìnnidu de su Supramonte.
Si sighit cun ‘Miradas’, un’espositzione intre antropologia, tzìnema e artes visivas cunforma a s’immàgine de sa bidda fraigada in sos annos dae chie l’at contada benende dae foras (Vittorio De Seta, Francesco Del Casino e àteros).
In fines su museu ‘Sonos’, un’ispàtziu ue su protagonista est s’iscurtu: dae sas mùidas de sa natura a sos càntigos feminiles, finas a sa potèntzia espressiva de su càntigu a tenore, reconnotu dae s’Unesco comente patrimòniu immateriale de s’umanidade.
S’eventu comintzat a sas 10 in s’Auditorium comunale de ‘Pratha de su Muntilhu’ cun sa cunferèntzia de imprenta, sighida dae sos saludos istitutzionales de su sìndigu Pascale Mereu. In programma fintzas sos contributos de sa project manager Paola Locci, de sos curadores e de sos espertos de su setore pro chistionare de sos interventos fatos, de sas istrategias de valorizatzione e de sos linguàgios cuntemporàneos adotados. A mesudie s’inauguratzione chi at a abèrrere sas ghennas a sos tres ispàtzios espositivos noos postos in puntos diferentes de sa bidda de sos murales.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
