Finas a su 10 de cabudanni sa rassigna de s’istadi “Cinema in valigia” portat su schermu mannu in is Medaus e in is fratzionis de Carbonia: otu proietzionis a indonu dedicadas a su cìnema sardu e a is istòrias de s’Ìsula, totus a is noi e mesa de note (21.30), cun sa presèntzia in pratza de registas e autoris.
Est sa prima atzioni operativa de sa lìnia Cinebus de su progetu “Bussola”, su servìtziu de prossimidadi finantziau de su Programa natzionali Metro plus e Città Medie Sud 2021-2027.
Ddoe funt logus chi a s’ispissu bènint cunsideraus a foras de sa cultura e de su sciri. Sa prima editzioni de «Cinema in valigia» nascit pròpiu po portai in is medaus e in is fratzionis de sa tzitadi su cìnema, in paris cun ocasiones de arresonu e cunfrontu chi sa de sete artis podit fai nasci.
Sa rassigna est promòvia de su Comunu de Carbonia e realizada de una partnership fata de sa Cooperativa Millepiedi, Assòtziu Culturali Babel, Fondatzioni Rts, My Culture e Terra de Punt srl.
“Sa punna po is annus chi ant a bènniri – faint isciri cun unu comunicau – est a fai de custus apuntamentus unu spàtziu de addòbiu e de scàmbiu, aundi cumpartziri esperièntzias e istòrias de vida. Ma puru valoritzai is spetificidadis, is capatzidadis, is produtzionis de medas realtadis chi cumponint su territòriu de Carbonia”.
Carbonia, Is Gannaus, Medau Desogus, Medau Brau, Serbariu, Medadeddu, Barbusi e Flumentepido ant a acolliri una rassigna dedicada a su tzìnema de su Sulcis, a sa memòria de is medaus e a is produtzionis chi contant identidadi e cultura.
Su Comunu de Carbonia tenit una strutura de domus e bixinaus “policèntrica”: a costau de su tzentru urbanu ddoe funt medas Medaus e fratzionis nàscias de sa stòria agrìcola e minerària. Micro-comunidadis chi custodint un’identidadi forti ma pagant una distàntzia de is servìtzius culturalis, atrupaus in su centru. Sa pratza de su Medau est unu logu de comunidadi. E s’istadi, candu torrant is emigraus, si multiplicant is notis a s’abertu, festas e sagras, est su momentu aundi unu de custus eventus culturalis arribat a su pùblicu prus mannu e de totu is edadis.
Su calendàriu
| Giòbia 30 de trìulas | Carbonia — Arena Mirastelle · «Quasi Grazia» di Peter Marcias |
| Sàbadu 1 de austu | Is Gannaus · «L’amore e la gloria» de Maria Grazia Perria |
| Giòbia 6 de austu | Medau Desogus · «L’Agnello» de Mario Piredda |
| Giòbia 13 de austu | Medau Brau · L’Arbitro» de Paolo Zucca |
| Giòbia 20 de austu | Serbariu · «Emilio Lussu: il processo» di Gianluca Medas |
| Mèrculis 26 de austu | Medadeddu · «Anna» di Marco Amenta |
| Giòbia 3 de cabudanni | Barbusi · «Tutti i cani muoiono soli» de Paolo Pisanu |
| Giòbia 10 de cabudanni | Flumentepido · «Assandira» de Salvatore Mereu |
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
