Dae eris in Thiniscole b’est “Largo Grande Cagliari”. Ma in antis de contare s’ùrtima cheret chi andemus a dae in segus cun su tempus, cando in sa bidda baroniesa apicheint una targa toponomàstica, mancari no ufitziale, in ue b’aiat iscritu “Via Grande Cagliari. Unica squadra straniera a vincere il campionato italiano”. Fiat su 2014. Deghe annos a como. Su messàgiu fiat craru. Non semus un’iscuadra italiana.
Como su Cagliari club “Baronia Rossoblù” at disinnadu de fàghere sas cosas fintzas prus manna pagu prus o mancu in su matessi giassu, in ue sas carreras de Roma e de Gramsci s’aunint conca a su bighinadu de ‘Untana. Unu cartellu inditat su logu e unu contone de 34 cuintales (unu pro cada annu de atividade de su club nàschidu su 1990) ammentat s’epopea de su 1970, cun s’immàgine de Gigi Riva bene in evidèntzia.
Sos de su Cagliari club ant organizadu sa faina dende atentu mannu a onni detàlliu. Presentes pro s’ocasione sos de su coro de Santa Luchia chi ant cantadu una poesia de Padre Luca Cubeddu (Tres rosas), s’innu natzionale sardu de Frantziscu Innàtziu Mannu e Su Bolu ‘e s’astore de Tonino Puddu dedicadu a Rombo di Tuono. Presente finamentas Marcella Bandinu, autora de una poesia collida in una regorta cuidada dae s’assòtziu Alas in bolu pro su campione de Leggiuno.
S’eventu (ocasione finamentas pro ammentare sos de su Club chi non bi sunt prus), una borta de prus, at ammentadu cantu su ruolu sotziale de s’iscuadra de Casteddu diat pòdere èssere importante in su fràigu de una cussèntzia de pòpulu. Ammentadu mescamente Gigi Riva, esèmpiu de comente si podet èssere sardos finamentas naschende in aterue.
Sos assotziados de su Cagliari club “Barona rossoblu”, in prus de s’organizatzione de sas essidas a Casteddu pro sighire sos beniaminos issoro, dae tempus sunt ativos in Thiniscole cun atziones positivas e ecològicas in su sartu e in sas prajas de su territòriu.
