Cando, una borta, sa maratona est durada 54 annos In s’isport est de importu fintzas comente si binchet o si perdet

Foto: lefotografiechehannofattolastoria.it

Calicuna borta sas istòrias de isport sunt cosa de ispantu meda. Comente cussa de s’atleta giaponesu Shizo Kanakuri, chi in su 1967 est isparidu de una maratona a inghìriu de sos trinta chilòmetros.

Isparidu.

Pro 54 annos.

Una gara difìtzile chene agiudos ufitziales

In su 1912 Shizo Kanakuri est tra sos favoridos printzipales de sa maratona de Istocolma. A 21 annos realizat su tempus mègius de s’annu: 40 chilòmetros e 200 metros in 2 oras, 32 minutos e 45 segundos. Su Giapone no at imbiadu mai atletas a un’Olimpìade a in antis de tando, ma creet meda in Shizo. Pro custu s’Universidade de Tokyo pagat su dinari pro fàghere partetzipare su maratoneta a sas Olimpìades de Istocolma de su 1912.

Sa die de sa gara est su 14 de su mese de trìulas. Sunt belle che 32 sos grados a s’umbra, e su regulamentu de sa maratona preubit abba e pròigos ufitziales. Mancu sos tècnicos o tziclistas si podent acurtziare a sos atletas.

Feti 34 de sos 68 atletas arribant a s’acabbo de sa maratona. Shizo, a metade de sa gara est primu, paris a su sud africanu McArthur ma, a su de trinta chilòmetros, s’atleta giaponesu iscumparet. Sa gara sighit, McArthur binchet.

Incumentzant sas chircas de sa Politzia in totu sa tzitade, però nemos l’agatat: Shizo Kanakuri est dichiaradu ufitzialmente ispèrdidu. Sa Politzia sighit a chircare rastas, ma nudda.

S’istòrias est aici particulare chi abarrat una legenda pobulare. Tantu bella ca, in su 1962, a s’anniversàriu de sos chimbanta annos de sa maratona de Istocolma, unu giornalista provat a ddu chircare in Giapone e chessit a si fàghere contare sa beridade subra ite est sutzèdidu in cussa gara famada.

Kanakuri at cùrridu pro belle 30 chilòmetros sena bìere. Pro more de sa basca s’atleta fiat a su lìmite de su collassu. E tandu, a su de trinta chilòmetros, Shizo at bidu una festa, cun gente chi fiat bufende sutzu de fruta: su maratoneta, mortu de sidis, no at cumprèndidu prus nudda. Sos meres de domo dd’ant acuntentadu e in prus…l’ant cumbidadu a si sètzere in su divanu pro reposare calicunu minuto.

Kanakuri s’est dormidu 10 oras in su divanu. Ischidadu, s’atleta at intèndidu cantu fiat grae sa responsabilidade pro s’Istadu suo. At pigadu unu trenu e est torradu in Giapone sena nàrrere nudda a nemos.

A sa fine si chessit a fàghere lughe a su fatu, e Shizo benit lamadu in Isvètzia pro acabbare sa maratona. In s’istade de su 1967, a su de 55 anniversàriu de sas Olimpìades de Istocolma, Kanakuri acabat sa gara sua.

Su tempu? 54 annos, 8 meses, 6 dies, 5 oras, 32 minutos e 20 segundos.

 
T'est pràghidu s'artìculu? Connosches bene s'argumentu e boles iscrìere carchi cosa pro megiorare s'informatzione? Iscrie·nos una lìtera a redatzione@istorias.it.