Nuscos de carrasegare in Thiniscole: su 16 de ghennàrgiu, in su cabu de logu baroniesu, essit pro sa prima borta ocannu sa caratza de s’Orcu de Montiarvu.
S’ocasione est sa de sa vigìlia de Sant’Antoni ‘e su ‘Ocu (de su fogu). A sero, in sa pratza de sa crèsia intitulada a s’abate, a pustis de sa missa in onore suo, sas framas de su ‘Olone ant a brusiare a pagu a pagu, e dae suta, sas frascas batidas sa domìniga in antis (sa domìniga de su ramasinu) dae sas cumpangias.
Su fogu, de màdrighe pagana, dae sèculos est s’omenàgiu a s’eremita chi fureit su fogu dae s’inferru pro caentare sa terra bestida de àstragu ierrile. E totu torrat cun su carrasegare chi si presenta a nois comente passàgiu conca a sa renàschida de sa vida.
Pro su sacrifìtziu de s’Orcu tocat a isetare su mese de martzu (ocannu Pasca est arta). Como sa prima essida sua (sa prima essita, in thiniscolesu) est petzi un’antìtzipu. Ma no est un’acaradedda ebbia, ca in programma b’at un unas cantas atividades culturales a costàgiu chi pròpiu sos de s’Orcu sunt aprontende cun àteros grupos locales.
Dae sas 5 de merie, in sas cortes Sinis e Mele, sas de su grupu folk La Caletta ant a èssere presentes contende s’istòria de su pistiddu, su durche de custu perìodu (chi su sero etotu l’ant a cumbidare sos de su prioradu); in sos matessi tretos su grupu Pinna e Tinteri (nàschidu in intro de sos cursos de limba sarda aprontados dae s’Ufìtziu linguìsticu) proponet unu laboratòriu poèticu temàticu; in fines, sa chircadora Antonella Minzoni torrat a espònnere sas fotografias e sa documentatzione de “Pro una perra ‘e pane”, mustra in contu de emigratzione cun protagonistas sos traballadores locales tzucados a Bèlgiu e sa suferèntzia issoro.
A concruos de serada, dae sas 8 de sero, sos ballos comunitàrios, cun su sonete de Pietro Porcu.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
