Annu nou, bombas noas? A sas sete de mangianu (ora italiana) de sàbadu su 3 de ghennàrgiu, unas cantas esplosiones ant interessadu sa capitale venetzuelana Caracas. Deretu su presidente bolivarianu at puntadu su pòddighe contra a Donald Trump. Chi in su social Truth at fintzas naradu de àere tentu a Maduro de nche l’àere giagaradu a foras de su paisu cun sa mugere.
Su fogu chi at allutu su chelu carachegnu, cando chi in cue fiant sas duas de note, rapresentat un’incruèschida de sas manovras istadunidenses contra a su Venetzuela chi, finas a como, si fiant limitadas a bombardamentos de navios in su mare caraìbicu e a bardanas petrolìferas semper in cussas abbas.
Non sunt bastadas sas garantzias de Nicolas Maduro in contu de gherra a sa droga e, mescamente, de oro nieddu: «Si cherent su petròliu venetzuelanu semus prontos a investimentos Usa, comente amus fatu cun Chevron, cando cherent, in ue cherent e comente cherent».
Nudda, su disinnu fiat pigadu dae meda e sas bombas de su 3 de ghennàrgiu lu cunfirmant. A su presente Trump pariat interessadu petzi a bombardare sa Nigèria e a minetzare s’Iran (àteros paisos cun petròliu meda). E a como non b’at nemmancu decraratzione de sos alleados de sa repùblica caraìbica, est a nàrrere Rùssia e Tzina.
Est galu chitzo pro cumprèndere sas cunsighèntzias ma unos cantos datos nos diant pòdere agiudare. Mosca at pèrdidu sa Sìria (mancari Israele l’apat pedidu de mantènnere sas bases militares suas) e no at difesu s’Iran dae sas bombas israelianas (dae Teheran b’at àpidu fintzas carchi acusa indiritzada a su Cremlinu). E Putin, l’ischimus, punnat a una vitòria definitiva in Ucraina.
Sa Tzina imbetzes mirat a Taiwan, chi la cheret intro de su 2027. Xi Jinping at naradu, in s’allega sua de s’annu nou, chi non si podet firmare sa re-unificatzione cun s’ìsula.
A chie l’ant a dare su Nobel pro sa paghe ocannu?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
