Trintacincu minutus apustis de mesunoti, ora italiana, giòbia est cumentzada Artemis II, sa missioni spatziali de sa Nasa chi at a portai un’echipàgiu in òrbita faci a sa Luna. Sa missioni est partia dae su Kennedy space center de Cape Canaveral, in Florida, cun su sistema de lanciu Space Launch System (Sls).
Est sa prima borta de su 1972 e est finas sa prima missioni de su sèculu de bintunu conca a su satèlliti de sa Terra. A intro de sa càpsula Orion nci funt cuatru astronautas: Victor Glover, Christina Koch, Reid Wiseman de sa Nasa in paris cun Jeremy Hansen de s’agèntzia spatziali de su Canada.
Artemis est unu progetu internatzionali de sa Nasa chi pertocat s’Itàlia puru. S’Europa, gràtzias a s’Esa, manìgiat su mòdulu de servìtziu chi donat energia a sa naveta Orion. Una parti de custu mòdulu dd’ant fabricada in Itàlia is sociedadis Thales Alenia Space e Leonardo.
S’obiettivu de sa missioni, chi at durai dexi diis, est cussu de bolai a inghìriu de sa Luna po provai sa navixedda Orion, invecis po arribbai diaderus a sa luna tocat a abetai su 2028 candu at a cumentzai un’àtra missioni, sa Artemis IV.
“Custa missioni sinnat unu momentu istòricu po s’esploratzioni de su spàtziu. Apustis de prus de mesu sèculu, s’umanidadi torrat a biagiai faci a sa Luna. Est unu passu de importu po is missionis lunaris chi ant a benni e poi arribbai a Marte”. Custus is fueddus de su presidenti de s’Agèntzia spatziali italiana (Asi) Teodoro Valente.
“Artemis II – sighit a nai – non est sceti una missioni de prova ma su primu passu de unu progetu chi punnat a ponni una presèntzia umana stàbili in sa Luna puru, apariciendi in su matessi tempus is tecnologias chi ant a serbiri po is missionis chi ant a benni conca a Marti. S’arrenèscia de custu lantzamentu amostat un’àtra borta cantu sa cooperatzioni internatzionali siat una cosa de importu mannu po parai fronti a is sfidas mannas de s’esploratzioni de su spàtziu. S’Itàlia at a sighiri a donai su contributu suu cun cumpetèntzias e innovatzioni in cust’època noa de s’esploratzioni.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
