Sa Sardigna sighit a fàghere is contos cun su problema de s’isperdìtziu iscolàsticu, unu fenòmenu chi in s’Ìsula donat meda pensamentu. Segundu is ùrtimos datos Eurostat pro su 2023, su tassu de abbandonu iscolàsticu at lòmpidu su 17,3%, unu valore meda prus artu siat de sa mèdia italiana (10,5%) siat de sa europea (9,6%).
Su datu est galu prus significativu si si càstiat a sa diferèntzia intre pitzocos e pitzocas: su fenòmenu interessat prus che totu is istudiantes mascos, cun una pertzentuale de su 23,4%, mentras intre is istudiantes fèminas su tassu si firmat a su 10,8%. Nùmeros chi ponent a notu sa netzessidade de interventos cuncretos e mirados.
Pro chircare de parare fronte a custu apretu, in is ispàtzios de sa MEM de Casteddu, su Comunu de Casteddu at presentadu eris su progetu “Inclusione per tutti gli studenti”, finantziadu cun in prus de 5 milliones de èuros gràtzias a su programa europeu PN Metro Plus 2021-2027. A s’addòbiu ant pigadu parte s’assessora a sa Pùblica Istrutzione Giulia Andreozzi, sa dirigente de su servìtziu Manuela Atzeni e is rapresentantes de is sotziedades Ars e Orientare, incarrigadas de gestire is fainas de chirca e acumpagnamentu.
S’initziativa at a interessare in prus de milli giòvanos de is 27 istitutos iscolàsticos de sa tzitade, tra mèdias e superiores, e punnat a abrandare s’abbandonu de is istùdios pro mèdiu de percursos educativos, orientamentu, iscurtu e incroimentu sotziale, interessenze famìlias e insinnantes. Sunt prevìdidas fainas de amparu, momentos de agregamentu e initziativas dedicadas a is pitzocos prus sugetos chi arriscant de non concruire is iscolas, ma fintzas a is chi ddas ant giai iscabudadas.
Sa cosa noa de su progetu est ruolu ativu de is istudiantes. Una tropa de pitzocos intre is 11 e is 18 annos at a retzire una formatzione ispetzìfica pro devènnere “chircadores intre uguales” (ricercatori tra pari): in pagos faeddos ant a dèpere iscurtare dae is fedales issoros is bisòngios, dificultades e propostas in is diversos bighinados de sa tzitade.
Sa punna est de cumprèndere mègius, dae intro, is motivos pro more medas giòvanos lassant s’iscola e chircare rispostas prus adatas a is esigèntzias issoro. Acabada custa prima fase de iscurtu, su Comunu at a publicare bandos ispetzìficos pro is iscolas, chi ant a pòdere presentare progetos educativos de incroimentu de realizare cun s’agiudu de espertos.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
