In prus de sas eletziones amministrativas, in ue bi las ant, s’8 e su 9 de làmpadas b’at 5 referendum in contu de tzitadinàntzia e de traballu. Semus faeddende de 5 cuesitos abrogativos promòvidos dae sindacados (comintzende dae sa Cgil) e movimentos tzìvicos chi cherent mudare unas cantas normas pro sas temàticas mentovadas. Argumentu tzentrale est su de su traballu sende chi si pedit, cun su primu, de torrare a pònnere sa tutela in casu de litzentziamentu illegìtimu comente fiat in antis de su jobs act rentzianu.
Pro mèdiu de sa segunda ischeda si cheret imbetzes abrogare su lìmite màssimu de s’indennizu econòmicu pro su is traballadores litzentziados sena càusa giusta e custu pro chi siat su giùighe a determinare sa rifata cunforma a sa gravidade de sas violatziones. Su de tres pertocat sos cuntratos a tèrmine e punnat a minimare sa precariedade. Cun su de bator cuesitos, in fines, nos pedint unu eja pro abrogare unas cantas normas chi, a bisu de is promotores, lìmitant sas responsabilidades de sas aziendas in contu de infortùnios.
A banda est su de chimbe, chi riguardat sa tzitadinàntzia pro is istràngios chi non sunt parte de s’Unione europea e chi punnat a nche barigare su rechisitu atuale de sos deghe annos de residèntzia legale pro l’otènnere.
Abroghende sa norma si cheret reduire custu tempus a chimbe annos. Sa dimanda est: podet su sindacadu, organizatzione de is traballadores, impreare una cramada a totu is tzitadinos? Emmo, lu podet fàghere si rinùntziat a sa batalla sindacale. Nono, no lu podet fàghere cun profetu, a dae chi a cussu referendum bi votant finamentas traballadores chi non sunt dipendentes e eletores cun orientamentu contràriu a sas rechestas de is salariados.
Fintzas ca, si nche bogamus sos referendum de su 2011 in contu de abba e nucleare (gràtzias a sas acontèssidas de Fukushima), est dae su 1997 chi andamus a sos sègios sena chi si lompat a su tantu de is votantes netzessàrios.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
