S’economia de su màndigu in Sardigna est rugrende una fase crìtica: cando chi sos volumes de produtzione non resessent a crèschere, a fermentare sunt sos costos chi sunt dende matana a 2.700 impresas artisanas de su setore.
S’allarme de Confartigianato Imprese Sardegna tirat un’istantànea de una crisi funduda cajonada dae sos rincaros generalizados de energia, matèrias primas e trasportos. In perìgulu est unu cumpartu intreu chi est capatze de ingendrare unu faturadu annuale de 873 milliones de èuros e de impreare prus de 9.500 prepostos.
Sos datos sunt graes: su costu de su gas pro sos furros est crèschidu de su 57%, colende in pagas dies dae 0,70 a 1,10 èuros pro cada metru cubu. Fintzas s’eletritzidade sighit una tendèntzia chi assustat, cun crèschidas istimadas intre su 21 e su 24% cunforma a su cumintzu de s’annu.
A custu s’agiunghet su chi pertocat sas matèrias primas. Sas anàlisis de freàrgiu de ocannu rivelant rincaros significativos pro su cacau in prùere (+17%), su cafè (+12,9%) e su tziculate (+6,8%), chi corfent a mannu pastitzerias e gelaterias.
Mancari sa crèschida de sos costos a sa produtzione, sos artisanos sardos chircant de cuntènnere sos prejos a su consumu, chi pro sos produtos dolciàrios sunt crèschidos in mèdia de su 3,1%, traballende cun rincaros mìnimos pro non truncare su ligàmene cun sa clientela locale.
Sa geografia de sa crisi bidet Tàtari–Gaddura comente àrea prus produtiva cun 250 milliones de faturadu, sighida dae su Sud Sardigna e Nùgoro.
Pro cuntrastare s’instabilidade de su mercadu, s’assòtziu punnat a s’autoprodutzione energètica pro mèdiu de impiantos fotovoltàicos, individuende in sa transitzione birde s’ùnica via pro garantire sa subravivèntzia de un’etzellèntzia produtiva chi, a pustis de àere superadu sa pandemia e sas tensiones internatzionales, est como gherrende contra un’ispirale inflativa sena pretzedentes.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
