Sa Sardigna no est petzi imbetzende; est acumprende a un’esperimentu demogràficu estremu cun resurtados chi non dant perunu cunfortu. Su report de Confindustria Sardegna pintat unu cuadru ue sa denadalidade no est prus una projetzione istatìstica, ma una ferida aberta in su tessutu econòmicu de s’ìsula.
Cun unu tassu de fecundidade firmu a 0,91 fìgios pro fèmina, sa Sardigna si piatzat a s’ùrtimu postu in Europa, brincada in peus petzi dae sas Canàrias. Mancu su paragone cun sa Corea de su Sud, sìmbulu globale de sa crisi de sas nàschidas, nos dat acunnortu: mancari chi Seul nascant prus pagos pipios, sa Sardigna sufrit un’imbetzamentu prus chi non mannu chi indebilitat meda s’istrutura sotziale e produtiva sua.
Prus de su 27% de sa populatzione at giai barigadu sos 65 annos, unu datu chi mìnimat sa cuota de residentes in edade ativa e atzèllerat sa desertificatzione de sos tzentros minores de sas zonas internas, ue s’inditze de betzesa tocat livellos de allarme. Totu custu tenet unu preju artu meda: belle 1,7 milliardos de èuros de capatzidade produtiva isvanèssidos in su nudda.
Si s’ìsula aeret mantesu s’istrutura demogràfica de su 2005, oe diat tènnere prus de 106mìgia traballadores sustentende su produtu internu brutu regionale. Imbetzes, si nch’agatat a gestire unu mercadu internu chi si restringhet e servìtzios pùblicos semper prus caros pro neghe de sa dispersione territoriale e de sa crèschida de s’assistèntzia.
Duncas non tocat petzi a intzentivare sa natalidade, ma a trasformare s’ìsula in unu logu capatze de tratènnere sos giòvanos suos e atràere cumpetèntzias noas dae foras pro cumpensare su bòidu generatzionale (fintzas cussas chi assuconant a calicunu pro more de una carena prus iscurigosa).
Custas sunt dies de cortes abertas in versione beranile. Ma cando giramus sas biddas tra unu ballitu sardu e unu paninu cun purpedda abbaidemus cantas sunt sas domos bòidas. Cantu traballu bi essit acontzende·las e canta economia girat cun gente abitende·las?
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
