Est cumintzada in manera ufitziale in s’Istitutu Superiore Regionale Etnogràficu de sa Sardigna su traballu de digitalizatzione de is archìvios suos, un’initziativa ambitziosa chi s’insertat in intro de su progetu Pnrr – Digital Library, finantziadu dae su Ministèriu de sa Cultura e coordinadu dae sa Diretzione Generale de s’Assessoradu Regionale a sa Cultura. Sa punna est de rèndere atzessìbile in lìnia libros, fotografias, istampas, cartulinas e documentos chi testimòniant sa memòria istòrica, artìstica e identitària de sa Sardigna.
S’interventu pertocat prus de 1.200 volùmenes, intre custos fintzas chèntinas de testos raros e de valore, medas imprentados in antis de su 1939. A custos s’agiunghent prus de 34.000 fotografias, 29.000 diapositivas, unas 3.000 cartulinas antigas e medas istampas. In totale si bolent digitalizare prus de 316.000 materiales, pro ddos pònnere a disponimentu de totus, chircadores, istudiantes e amantiosos, in sa Digital Library natzionale. Tra is documentos prus de importu faghet a remonare fintzas is manuscritos de Grazia Deledda, arrimados in sa biblioteca de s’istitutu, cunsiderados intre sos fundos prus significativos de sa literadura italiana de su Noighentos.
Su progetu est finantziadu cun 2.387.000 èuros, postos in su 2023 in su cuadru de sa Missione 1 de su PNRR, dedicada a sa digitalizatzione, a s’innovatzione e a sa valorizatzione culturale. In prus de s’ISRE, in Sardigna sunt interessados fintzas s’Assessoradu regionale a s’Indùstria e sa sotziedade a partetzipatzione pùblica IGEA. Sa faina de digitalizatzione, chi est giai inghitzada in is seas de s’istitutu in Nùgoro: cun unu ritzmu de 3.000 pàginas traballadas a sa die, si pensat chi sa digitalizatzione at a durate su mancu finas a s’agabbu de su 2026.
S‘Assessora regionale a sa Cultura, Ilaria Portas, at definidu su progetu “unu passu fundamentale pro amparare e avalorare su patrimòniu nostru, ponende·ddu a disponimentu de totus”, sutaliniende su ruolu istratègicu de sa cultura in su fràigu de s’identidade sarda e in s’innovatzione de is servìtzios pùblicos. Su presidente de s’ISRE, Stefano Lavra, cuntentu mannu pro s’inghitzu de is traballos, at torradu gràtzias a sa Regione pro su progetu e at postu anotu s’importu de custa operatzione pro sa memòria colletiva.
Su progetu s’insertat in su percursu prus ampru aviadu in Sardigna pro sa valorizatzione digitale de su patrimòniu culturale. In custa òtica, s’ISRE collàborat cun sa Sardigna Digital Library, prataforma giai ativa dae su 2008 chi at a èssere integrada in s’architetura natzionale noa prevìdida dae su PNRR. In Casteddu, in prus, dae pagu ant inauguradu su Dicolab Sardegna, unu de sos polos territoriales pro sa transitzione digitale de is benes culturales italianos.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
