Sos Kenze Neke ant disinnadu de si nch’essire dae Spotify in cuntrastu cun sos sèberos bèllicos de su mere de sa prataforma nòdida.
«Chie nos sighit dae cando sunt essidas sas primas produtziones nostras – gasi comintzat sa nota issoro publicada custas dies – ischit chi sa mùsica nostra no l’amus fata tantu pro la fàghere. Pro mèdiu de custa forma de espressione artìstica amus semper veiculadu messàgios craros e privos de dudas: de lota de classe e de solidariedade intre sos pòpulos. Mai nos semus inghenugrados a sas règulas de s’indùstria discogràfica eris e mai amus a legitimare sos sèberos de sos meres de sas prataformas digitales oe».
In antis de intrare a su criu de sa chistione, sos Kenze Neke ant tocadu s’argumentu de su capitalismu musicale de custas indùstrias digitales: «Non bastaiat s’acùmulu de richesa (15 milliardos de dòllaros de faturadu su 2024) ingendrada dae sas riprodutziones (streaming) de maicantos artistas malepagados, como Spotify nch’est in intro de sos investimentos in contu de tecnologia bèllica, cun sos efetos disumanos de custa, pro nàrrere, chi los connoschent bene bene in Gaza vìtima de unu genotzìdiu».
«Su mere de sa prataforma mentovada – sighit su comunicadu de Kenze Neke – est ponende a disponimentu de sa distrutzione belle 700 milliones de dòllaros devennende unu de sos printzipales atzionistas de s’azienda tedesca Helsing, ispetzializada in s’isvilupu de sa tecnologia pro sos impreos militares. No l’at a fàghere a contu nostru. Nois naramus chi NONO e annuntziamus de àere comintzadu sas protzeduras de ritiru de su catàlogu nostru intreu. No ais a agatare prus sos Kenze Neke in Spotify e diamus chèrrere a fagherent ateretantu àteros musitzistas. Sa mùsica non devet pigare parte a su riarmu pro gherras chi a sos pòpulos non bisòngiant; sa nostra at a èssere semper sa colunna sonora de sos opressos».
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
