Ite est narende Enrico Letta a pustis de sa derrota eletorale de sas polìticas in pessu coladas lu semus bidende. Ite naraiat su mese de làmpadas est possìbile chi nos lu siamus ismentighende. A s’in cras de sos referendum in contu de giustìtzia e de sas amministrativas, su segretàriu de su Pd proponiat aterunu contu e diferentes fiant sas prospetivas.
Movende dae sos cuesitos, Letta punnaiat a sa tzentralidade de su Parlamentu: «Cheret chi sa polìtica ascurtet sa sabidoria de sos tzitadinos italianos. Sas riformas cherent fatas in àula e sa de custa majoria est un’ocasione irripetìbile». Movende dae sos resurtos de sas amministrativas custu annanghiat: «Su tzentru manca binchet cando est unidu e su Partidu democràticu est su primu partidu de Itàlia». Su cumbinadu de custas duas afirmatziones de su polìticu pisanu nos cunfirmat chi sas amministrativas e sas polìticas sunt duos livellos diferentes e chi sa majoria a sustegnu de Draghi, non de fàghere sa riforma de sa giustìtzia, nemmancu sa riforma de sa lege eletorale at aprontadu. Immaginemus·nos cantu podiat acumprire a un’agenda de tzentru manca pro mantènnere aunida una coalitzione cun su Movimento 5 stelle.
Chi no est de badas chi s’est presentadu comente una fortza de manca faeddende de giustìtzia sotziale traita dae sos de s’agenda Draghi. Como su Pd s’est incaminende conca a su cungressu suo ma s’ipòtesi chi potzat èssere s’ùrtimu est in sa mesa. Si gasi esseret si serrat unu tziclu abertu cun su “ma anche” veltronianu. Est a nàrrere una fase longa 15 annos de manca “ma anche” de tzentru; un’ammesturu lib-lab pro un’esperièntzia nen lib e nen lab. Chi como dae custu busìllibu nd’essant a campu duos partidos, unu laburista pro afortire su raportu cun sa manca parlamentare de Conte e de Frantoianni/Bonelli e unu liberale a manu tenta cun Renzi e Calenda? A bìdere istemus.
E in Sardigna? Sas cosas de bìdere sunt de prus. In tantu su Pd sardu no est una summatòria de Ds e Margherita ebbia: proa nde siat sa fortza de sos sotzialistas e s’intrèveru Antonello Cabras – Giacomo Spissu in sa ghia de sa Fondazione di Sardegna. E posca est probàbile chi su campu largu chi no ant fatu in Roma potzat resèssere in Sardigna cun totu cantos in intro. Zedda l’at giai propostu, pro nàrrere. Ma, narat su ditzu, “b’at prus tempus chi non sartitza”.
Atividade realizada cun su contributu de sa Regione Sardigna – Imprentas 2021-2022. Lr 22/2018, art. 22
Attività realizzata col contributo della Regione Sardegna – IMPRENTAS 2021-2022. LR 22/2018, art. 22
