Dae su 7 a su 12 santandria s’Exma de Casteddu torrat a ospitare su FestivalScienza cun 23 laboratòrios, 14 cunferèntzias, 11 presentadas de libros e, galu, mustras, animatziones, cuntzertos, mesas tundas, progetos ispetziales e prèmios dedicados a sas fèminas.
Prevìdidos eventos finamentas in s’àula magna de su retoradu, in sa biblioteca “Emilio Lussu” de Monte Claro, in sa biblioteca metropolitana de sos pitzocos, in sa Fondazione Banco di Sardegna, in s’istitutu cumprensivu “Giusi Devinu”, in sos museos de Fìsica, de Zoologia e de Antropologia e Etnografia, in su Parcu de Molentargius e in sa Necròpoli de Tuvixeddu.
Su tema de ocannu est su de sa contaminatzione e, movende dae custu cuntzetu, unu de sos momentos tzentrales est rapresentadu dae sa mesa tunda in programma in s’Exma su 10 de santandria dae sas 10. S’at a faeddare de sa netzessidade de un’umanèsimu iscientìficu nou chi nche bàrighet sas barrieras intre mirada iscientìfica e umanìstica. Rens Bod, Arianna Ciula, Alberto Credi, Giampaolo Salice, Jose Angelino, Roberto Camporesi ant a faedddaee, difatis, de contaminatzione intre sas disciplinas pro contribuire a unu fràigu dialèticu e intercunnètidu.
Ma su fèstival – fintzas ocannu – no at a èssere in Casteddu ebbia. Dae su 12 de santandria sa manifestatzione sighit in Aristanis (su 12 e su 13), in Nùgoro (su 13 e su 14), in Senobrì e Ìsili (dae su 20 a su 23) e in Igrèsias (dae su 27 a su 29) pro addobiare sas istitutziones iscolàsticas e universitàrias e sos apassionados de iscièntzia de cuddos territòrios.
Sa de deghessete editziones de su FestivalScienza est organizada dae s’assòtziu ScienzaSocietàScienza ghiada dae Davide Peddis. Su fèstival rapresentat unu tassellu de grandu importu in intro de sas initziativas natzionales dedicadas a sa divulgatzione iscientìfica cun riferimentu particulare a su mundu de s’iscola e a sa promotzione de sa letura.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
