Inauguradu in Osidde su Museu Andrea Parodi: unu donu a sa poesia de amore pro sa Sardigna, in ue arte, mùsica e passione pro sa Sardigna s’atritzant in unu contadu ùnicu. Partzidu in bator salas multimediales, su museu oferit un’immersione in s’universu artìsticu e umanu de Andrea Parodi pro mèdiu de imàgines, testimonias e amentos, tzelebrende sa vida de su cantante e su ligàmene profundu suo cun sa cultura sarda.
Realizadu dae sa Fundatzione Andrea Parodi cun s’amparu de sa Regione Autònoma de sa Sardigna, de sa Fondazione di Sardegna e de su Comunu de Osidde, su museu si proponet comente ambasciadore de sa cultura isolana, promovende s’eredade culturale e musicale chi Parodi at contribuidu a fàghere connòschere.
Su Museu multimediale, acasagiadu in sa domo comunale, oferit unu biàgiu in su coro de s’arte de Andrea Parodi e de su messàgiu suo de amore pro sa Sardigna, una terra chi at ispiradu bona parte de sa produtzione artìstica sua.
Osidde est unu logu importante in s’istòria de Andrea Parodi. Sa bidda difatis fiat istadu s’iscenàriu de “Lune di Osidda,” manifestatzione musicale chi s’acumpriat durante sa luna prena, e fiat istadu fintzas su logu seberadu pro su coju cun Valentina Casalena, oe presidente de sa Fundatzione Andrea Parodi. “Abèrrrere su Museu inoghe est comente a fàghere torrare a bìvere Andrea”, at declaradu Valentina, sutaliniende su significadu personale e culturale de custu sèberu.
Su progetu de su museu est su frutu de unu traballu cuidadu e ìntimu, chi Valentina e Luca Parodi, fìgiu de s’artista e vitzepresidente de sa Fundatzione, ant chèrfidu cun totu su coro. “Cada sala de su museu est un’esperièntzia immersiva,” ispiegant, “cun oras de vìdeu e contos chi permitent de iscobèrrere sa vida e s’amore suo pro sa Sardigna.”
A sa tzerimònia de inauguratzione de domìnigu coladu in sa Domo Comunale de sa carrela de Angioy, ant leadu parte sas maschera de su Grupu Boes e Merdules de Otzana e Federico Marras Perantoni, finalista de su Prèmiu Andrea Parodi, chi at serradu sa die cun unu tributu musicale in turritanu.
Su Museu Andrea Parodi at tentu àteras sede de importu in Casteddu, in s’Ostello de sa Gioventude, in sa Domo de is Fenudes de Otzana, in su Museu Etnogràficu “Sa Domo Manna” de Biddanoa Monteleone, in su Palàtziu de su su Marchesu de Portu Turre, ma como, gràtzias a sa collaboratzione cun su Comunu de Osidde, at a èssere acasagiadu in sa bidda de su Monteagudu a su mancu pro chimbe annos, consolidende su ligàmene intre Parodi e custa comunidade.
–
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
