Prus de 110 giornalistas sardos narant de àere retzidu minetzas. Sunt prus che totu pubblicistas (su 80%), precàrios, intre is 35 e 55 annos, chi traballant in setores diversos: dae sa crònaca a sa polìtica a sa cultura, a s’isport.
Est su datu bessidu a campu dae s’addòbiu ‘I Ranucci invisibili: l’informazione sarda e le intimidazioni’, organizadu in Casteddu dae s’Òrdine de is giornalistas de sa Sardigna, a s’incras de s’atentadu a su giornalista de Report Sigfridu Ranucci.
“Pròpriu in cuddas dies – at contadu su presidente de s’Odg Giuseppe Meloni – unu collega, adobiadu casualmente e chi at pedidu de abarrare anònimu, m’at naradu s’esperièntzia sua, is minetzas fatas contra a issu dae amministradores locales e àteras personas. Unu Ranucci chi non si biet, apuntu, chi no est una nova ca issu non denùntziat. Pensende a custas situatziones – at ispiegadu – amus imbiadu a totu is iscritos unu cuestionàriu anònimu. In 219 ant respostu, prus de sa metade at declaradu de àere subidu minetzas”.
Is minetzas arribbant comente cuerela pro faghet tìmere su giornalista o minetza de càusa (su 15,7%), a traessu de sotzial network e messàgius (su 28,7%), cun fueddos malos e minetzas diretas (su 37,4%). In unos cantos casos sunt fìsicas (su 3,5%).
Pressiones e minetzas arribbant, pro su 33,3% de is casos, dae polìticos e amministradores pùblicos, dae letores ‘arrennegados’ (su 27,4%), ma fintzas dae collegas o superiores (belle su 13%). Intre cussos chi ant comunicadu de àere subidu minetzas, prus de sa metade (su 55%) no at però denuntziadu nen signaladu nudda ca timiat cunsighientzias in su traballu.
“Pro dare unu signale de amparu a collegas chi non benint tutelados amus detzìdidu de aberrere unu fundu isperimentale de 5milli èuros pro consulèntzias legales, destinadu a chie deveret subire minetzas, pressiones o cuerelas de custu tipu”.
Atividade realizada cun su contributu de sa Regione Sardigna – IMPRENTAS 2025-2026. LR 22/2018, art 22. Attività realizzata col contributo della Regione Sardegna – IMPRENTAS 2025-2026. LR 22/2018, art. 22
