Sas tzelebratziones pro sos chimbant’annos dae sa morte de Emilio Lussu, intelletuale, iscritore e polìticu sardu, sunt cumentzadas su primu de martzu in Armùngia, bidda nadale sua. Sàbadu coladu, s’amministratzione comunale e unos canto assòtzios, ant ammanniadu su primu eventu de sa rassigna cun unu cunvegnu de aprofundimentu dedicadu a sa figura de s’intelletuale armungesu. In s’addòbiu, istòricos e istudiosos ant torradu a costrùere su profilu de Lussu, ponende a notu su ruolu tzentrale suo siat in s’istòria de sa Sardigna e de s’Itàlia, siat in su panorama antifascista internatzionale.
Intre sos reladores presentes, s’istòricu Gian Giacomo Ortu at evidentziadu s’importu de su contributu chi Lussu at donadu a sa luta contra su fascismu: “Est istadu unu personàgiu istraordinàriu pro sa Sardigna e s’Itàlia, ma fintzas pro totu s’Europa. Cando fiat in esìliu, est istadu unu de sos esponentes prus importantes de s’antifascismu in s’èsteru”.
Su sìndigu de Armùngia, Antonio Quartu, at sutaliniadu s’importu de custa sèrie de eventos: “Ocannu ruet su chimbantenàriu de sa morte de Emilio Lussu, e su comunu de Armùngia l’ammentat cun unu tziclu de initziativas chi ant a durare totu s’annu”.
Alberto Cabboi, Diretore de su Museu Emilio e Joyce Lussu, at agiuntu: “Sas tzelebratziones cumprendent momentos de istùdiu e aprofundimentu, rassignas culturales e progetos espositivos. Su museu at a èssere protagonista de custas fainas, mescamente su polu culturale dedicadu a Gramsci”.
Su cunvegnu at dadu una mirada funguda subra sa vida intensa de Lussu, dae sa trintzeras de sa Gherra Manna a sa fundatzione de su Partidu Sardu, dae s’aficu antifascista suo a sa faina literària, finas a sa partetzipatzione a s’Assemblea Costituente. Una vida bìvida cun passione e impinnu, cumpartzida cun sa cumpàngia Joyce, sighende semper sos printzìpios de su sotzialismu, de sa giustìtzia e de sa libertade.
Armùngia ammentat su tzitadinu suo de cabbale fintzas pro mèdiu de su patrimòniu istòricu acapiadu a figura sua: sa domo nadale in su bighinadu de Cannedu, sos padentes de Murdega, sos logos de sa pitzinnia sua e de sa passione polìtica. Dae unos cantos meses, in prus, su Tzentru Polifuntzionale acasàgiat s’istùdiu de Emilio Lussu, cuberadu dae sa domo sua de Casteddu, teatru de s’assàrtiu fascista de su 31 de santugaine 1926.
Sas tzelebratziones de su chimbantenàriu prevident fintzas s’assètiu de s’archìviu e de sa biblioteca personale de Lussu, fonte pretziosa pro istudiosos e chircadores.
A s’eventu ant leadu parte fintzas Giovanna Granata, dotzente de Bibliografia e Biblioteconomia in s’Universidade de Casteddu, Christian Rossi, dotzente de Istòria de sas relatziones internatzionales, e Monica Grossi, Subrintendente Archivìstica de sa Sardigna.
Sas tzelebratziones ant a sighire in sos meses imbenientes cun àteras initziativas pro poderare biu s’amentu e s’eredade de Emilio Lussu, figurat crae in s’istòria de sa Sardigna e de sa luta antifascista internatzionale.
Giòbia su 6 de martzu, a ora de sas 10.30, fintzas su Comunu de Casteddu at a subènnere sa figura de Lussu cun unu cunvegnu abertu a totus in sa passigiada coberta de su Bastione Saint Remy.
Attività realizzata col contributo della Regione Sardegna – IMPRENTAS 2024-2025. LR 22/2018. Atividade realizada cun su contributu de sa Regione Sardigna – IMPRENTAS 2024-2025 LR 22/2018
