Comintzat oe sa de 28 editziones de Monumenti Aperti. Custu fine de chida ant a èssere prus de 130 sas atratziones propostas a sos bisitadores disigiosos de si fàghere unu biàgiu in su tempus e in sos logos. Sete sos tzentros interessados oe e cras: Tàtari, Portu Turre, Santu ‘Èngiu, Cuartu, Sant’Antiogu e sas duas noas Nurachi e Samassi, pro sa prima bia in intro de su tzircùitu.
Ambas duas biddas sunt campidanesas: sa prima de su Campidanu de Aristanis, s’àtera de su Campidanu de Seddori. E ambas duas mustrant elementos simigiantes de màdrighe massajina. De Nurachi connoschimus su binu biancu tìpicu Vernàccia cun traditzione manna in cussos tretos. Ma in su territòriu, pro more de nch’èssere a làcana cun Cabras, b’at fintzas traditzione de pisca. De Samassi si podet nàrrere chi est terrinu in ue bi bundat s’iscartzofa, protagonista de sa fiera chi li faghent.
In ambas duas sas biddas est possìbile a mirare sas domos in làdiri, in terra crua. In Nurachi s’ant a pòdere bìdere sas cantinas Sardu e Caddeo, sa crèsia parrochiale de Santu Giuanne Batista, su museu etnogràficu Peppetto Pau e s’òasi naturalìstica de Pischeredda. Bator sas crèsias abertas in Samassi: sa de sa Vìrgine de Musserradu, sa de Santu Geminiano, sa de Santu Giosepi e sa de Santa Margarida. Abertas fintzas s’iscola primària fraigada in ue b’aiat unu cumbentu agostinianu e sas domos Pau e Pittau cun trastes e aposentos chi nos agiudant a cumprèndere comente fiat sa produtzione agrìcula.
Monumenti Aperti – manifestatzione organizada dae Imago Mundi OdV cun su contributu de su Ministeru de sa Cultura, de sa Regione Autònoma de Sardigna e de sos Comunes interessados – at a propònnere in totu sèighi datas finas a su 27 de santugaine cun 76 tzentros sardos, unu pulliesu (Bitonto) e unu romagnolu (Ferrara). Otighentos logos abertos e cun intrada gratùita contados dae mìgias de ghias voluntàrias.
Attività realizzata col contributo della Regione Sardegna – IMPRENTAS 2023-2024. LR 22/2018. Atividade realizada cun su contributu de sa Regione Sardigna – IMPRENTAS 2023-2024 LR 22/2018
